۴۴. شفای پیا حاس که وِ دَسِ پترس ئو یوحنا

یِه روز پترس ئو یوحنا می‎رَتِن وا لا پرستشگاه. دِ تِه دروازَش، پیا فِلَجی‌نِه دییِن کِه حاس می‎کِرد.

پترس سِیل اُو پیا فِلَج کِرد ئو گُت: «مِ هیچ پیلی نارِم کِه وِ تو بِئم. اَما اُو چی‎ئی کِه دارِم، وِت مِئِم. دِ نُوم عیسی، وِریس ئو رَه رُو!»

خدا دَر جا اُو پیانِه شفا دَ ئو او شُرو کِرد وِ رَه رَتِن ئو دِ دُور ئو وَر اونُو شادی می‎کِرد ئو خدانِه پرستش می‎کِرد. مَردِمی کِه دِ مین حیاط پرستشگاه بی‎یِن، وا رَتِن.

جَمیَت زیادی آزِه جَم بی‎یِن تا اُو پیائی‌نِه کِه شفا پیا کِردی بِئی‎نَن. پترس وِ اُو جَمیَت گُت: «دِ دییِن شفا ای پیا بِلاجی‎تُو نیا. اِیما ای پیانِه وِ قدرت‌ یا وِ خاطِر دینداری خُمُو شفا نَدِئی‎مَه. بلکه یِنَه قدرتِ عیسی‎ئَه کِه اونِه شفا دِئَه، سی‎یَه‎کِه اِیما وِ او ایمان داریم.»

«شِما کَسُونی هیسیت کِه دِ فرمُوندار رومی حاستیت کِه عیسی‎نِه بَکُشَه. شِما وَنِه کِه وِ هَمَه جُو مِئَه کُشتیت، اَما خدا اونِه دِ مین مُردیا زِنَه کِرد. هَرچَن کِه شِما نُوئِنِسیت ها چِی میکیت، اَما پیشگویی پیومبریانِه عملی کِردیت کِه گُتِنی مسیح بایس عَذاو بَکَشه ئو بَمیرَه. خدا حاست کِه ای طوری بووَه. پَ توبَه بَکیت ئو وِرگَردیت وا لا خدا تا او گناه‎یاتونِ پاک بَکَه.»

وَختی رَبَریا پرستشگاه حرف‎یا پترس ئو یوحنانِه شِنَفتِن خیلی عَصَبُونی بی‎یِن. اوسِه اونُونِه دَسگیر کِردِن ئو وَنِن دِ زِندُون. اَما خیلی دِ وِنُونی کِه پیغوم پترسِه شِنَفتِن، ایمان اُوِردِن ئو شمارِ ایمانداریا وِ۵۰۰۰ نفر رَسِس.

روز بَد، گپونِ یهود، پترس ئو یوحنانِه وارْد اُو پیا فِلَج اُوِردِن وِ ته کاهن گَپ ئو رَبَریا مذهبی. اونُو دِ پترس ئو یوحنا پُرسین: «وا چِه قدرتی ای پیا فِلَجِه شفا دئیت؟»

پترس جِوُو دَ: «ای پیا کِه ریی وِ ریی شِما هِسائَه وِ قدرتِ عیسی مسیح شفا پیا کِردَه. شِما عیسی‎نِه کَشی‎ئیت وِ صلیب، اَما خدا اونِه دُوارَه زِنَه کِرد! شِما اونِه قبول نَکِردیت، اَما رَه نجاتی هَنی نیسا، جز وِ قدرت عیسی!»

رَبَریا مذهبی دِ جُرَت پترس ئو یوحنا وا رَتِن، سی‌یَه‌کِه اونُو آیِم‎یا بی سواد ئو معمولی‎ئی بی‎یِن. اوسِه اُوِردِن وِ ویر کِه ای پیایا وا عیسی بی‎یِن. پس وِشُو گُتِن: « اَر هَنی هَم دِبارَه عیسی وا مَردِم حرف بَزِنیت شِمانِه سخت تنبیه میکیم.» اونُو دِما یَه کِه وِ پترس ئو یوحنا سَم‎سی کِردِن، آزادِشُو کِردِن.