۲۱- خِداوَند، وَعدِه دِنّه که مَسیح اِنه
خِدا هَمون اَوّلایِ دیافْریئِن خَلِه خار دونِسِّه که مَسیحِ وَعدِه بَئی رِه خَلِه زَمون بوگذِشتِه پِه، رایی کِنده. وِه آدِم و حَوّا رِه وَعدِه هِدا بی یِه که بی گِمون اینتا کار رِه سَرانجام دِنّه. خِدا وَعدِه هِدا کِه حَوّایِ ِتوارِ جِه اَتّا کَس اِنه که مَرِ کَلِّه رِه لو کِندِه. اونتا مَر که حَوّا رِه گول بَّزو، خِدِ شِیطون بی یِه. وَعدِه اینتا بی یِه که مَسیح، شِیطونِ قِد ره بِنه زَنده وُ همیشِک وِنه سر سِواره.
خِدا ابراهیم رِه وعده هِدا کِه وِنِه جِا تِمومِ مَردِمِ دِنیا فِراوونی و بَرکِت گیرنِنِه. اَت مُدّت بوگذِشته پِه خِدام شِه وعده ره اینطی انجام دائه که مسیح ره رایی هَکنه. مسیح وِسّه که تِمومِ مَردِم ره ،هَر قومِ جه که بَوّن،وِشونِ گِناهایِ جِه وِشون رِه آزاد هَکِنِه.
خِدا موسی رِه مِژدِه هِدا که اَتّا رِها کِنِنده وِنِه واری اِنّه. اینتا رِها کِنِنده هَمون مَسیحِ وعده بَئی بی ِیه. اینطی خِدا اَی دِوارِه مَسیحِ بیَموئِن رِه مِژدِه هِدا.
خِدا داوودِ پادِشاه رِه وَعدِه هِدا کِه وِنهِ تِوارِ جِه اَته کَس َپادِشاه بُونِه و تا دِنیا بَرقِرارِه، خِدایِ قومِ ره فَرمونرِوایی کِنده. حَقیقِتِ که مَسیح، داوودِ تِوار جِه اِنِّه.
خِدا اِرمیایِ پَیغومبِرِ جِه مِژدِه هِدا کِه اَتّا نو پَیمون وَندِه، مُنتا نا اونتا پَیمون وَنِکِت که سینا کویِ دِلِه، اسرائیلیایِ جِا دَوِسِّه بی یِه،ِتازه پَیمون کِه خِدا وَندِه، مَردِم دِِل دِلِه بَنوِشتِ بوُنه، مَردِم شه خِدا رِه اِشناسِنّنِه و وِرِه دوست دارِنِّه و وِنِه دَستورای جِه فَرمونبَری کِنِّنه. مَسیح همون آدِمی بی یِه کِه نو پِیمون رِه وِشونِ جا دَوِسِّه. وِشون وِنه قوم بونِنِه و خِدا وِشونِ گِناها رِه بَخشِنِه.
خِدای پَیغُومبِرا اَی باتِنِه که مسیحِ وَعده بَئی، پَیغومبِر، پیشوا و پادشاه هَسِّه. پَیغومبِر اونتایی هَسِّه که خِدای گَپ رِه اِشتونّه و مَردِمِ وِسِّه گِنِه. مسیحی که خِدا مِژدِه هِدا پِیغومبِِری هَمه چی تِموم هَسِّه، چونکه وِه خِدایِ پَیغُوم رِه خار خار دَرک کِندِه و همینطییِم مَردِم ره هالی کِنده.
یهودیایِ پیشواها، مَردِمِ عَوِض خِدای وِسّه قِربونی کِرد بینه که وِشونه گناهای بَدِل حِساب بَوّه. پیشواها، خِدایِ دَرگاه مَردِمِ وِسّه دِعا کِردِبینه. مسیحِ وعده بَئی، قِرار بِی یِه گَتِ پیشوا بَوّه که شِه خِدِرِه بی نَقصِ قِربونیِ واری ، خِدای وِسِّه پیشکِش هَکِنِه. یعنی وه هیچ زِمون گِناهی نَکِنِّه و وِه که شِه خدِرِه قِربونی واری پیشکِش َهکِنِه، گِناهایِ وِسّه اَی اَتّا قِربونیِ دیگه لازِم نَوونِه.
پادشاها و مَملِکِت دارا اَتی مَردِم ره فَرمونروایی کِننه و اَتیِم اشتباه دارنِنه.. داوودِ پادِشاه، شِه تیناری ،اسرائیلیایِ سَر فَرمونروایی هَکردِه. مُنتا مَسیحِ وعده بَئی کِه داوودِ تِوارِ جِه اِیَیمو، تا دِنیا بَرقِرارِه فَرمونرَوایی کِنده. وِه با عِدالِت پادشاهی کِنده و دِرِسِ تَصمیم ره گیرنِه .
پَیغومبِرایی کِه خدا وِشونِ راهی هَکِردِ بی یِه ، مَسیحِ وعده بَئی دَرواره خَلِه پَیغُوم بِیاردِنِه. مَلاکیِ پَیغومبِر پَیغُوم بِیاردِ بی یِه کِه اَتا گََتِ پَیغومبِرِِ دیگِه، مَسیحِ وعده بَئی نی یَم پِه ،انِه. اِشعَیایِ پَیغومبِر پَیغُوم هِدا بی یِه کِه مَسیحِ وعده بَئی، اَتّا دَس نَخِردِه کیجایِ جِه دِنیا اِنِه. میکاهِ پَیغومبِرِم باتِه که وِه بِیت لِحِمِ دِلِه دِنیا اِنِّه.
اِشعَیایِ پَیغومبِر باتِه کِه مَسیح ، جَلیلِ دِلِه زِندِگی کِنده. وِه بِشکِسّه دِلا ره آرامِش دِنّه و اَسیرا رِه رِهایی دِنّه. وِه اَی پَیغُوم هِدا کِه مَسیحِ وعده بَئی هَر چی کور، شَل ، غول و لال هَسّنِه دَرد رِه دِوا کِنده.
اِشعَیایِ پَیغومبِر اَی پِیغُوم بیارد بی یه کِه مَردِم مَسیحِ جِه بَد کَفِنِنه و وِرِه نِخوانِنه. پَیغومبِرایِ دیگئم پَیغُوم بیارد بینِه که مَسیحِِ اَتِّه رَفِق وِِره روشِنه ونامَردی کِنده. زَکریایِ پَیغومبِر پَیغُوم بیارد بی یه کِه اینتا رَفِق ، سی تا سِکِّة نقرة وِّسِه نا سِپاسی کِنده وُ وِره روشِنه. اَی پَیغومبِرایِ دیگِه پَیغُوم بیاردِنه کِه مَسیح رِه کِشِننِه و وِنِه تَنِ جِمهٔ وِسّه قرعه دِمدِنِنه.
پَیغومبِرا اَی پیغُوم بیارد بینِه کِه مَسیح چِطی میرنِه. اِشعَیایِ پَیغومبِِر بات بی یِه کِه مَردِم وِنِه دیمِ فِلیک شَنِِّنِه و وِرِه روشِنِنه و وِرِه دَست دِم دِنِنه. اونگِدِر وِنِه تَن رِه سوراخ کِنِّنِه تا جَزر بَکِشِه و بَمیرِه.با اینکه وِه هیچ گِناهی نِداشت بی ِیه.
پَیغومبِرای دیگِرِم پِیغُوم بیارد بینِه کِه مَسیحِ وعده بَئی وِنِه اَتّا کامِلِ مَرد َو بی گِنا بَوّه. وِنِه کِه وِه بَمیرِه، چونکِه خِدا وِرِه تِمومِ مَردِمِ دِنیایِ گِناهایِسّه سِزا دِنّه. وِنِه زَجر بَکِشی یِن وِسّه بی یِه کِه خِدا و اِنسانِ میونِه صُلح و آرامِش دَکِفِه. همینتایِسّه خِدا خواسّه که مسیح زخم بَخِره و بَمیره.
پَیغومبِرایِ دیگِئم پَیغوم بیاردِنه که خِدا مَسیح رِه بَمِردِ پِه، اَی دِوارِه زِندِه کِنده. هَمینتاسّه خِدا بِخواسِّ بی یِه که عیسایِ بَمِردِن و زِندِه بَئِّینِ جا ، گِناهکارایِ آزادیِ وِسّه شِه دَچّی برنامه ره اَنجام بَرِسِنِه و اَتّا نو پَیمون ره مَردِم ِِ جا دَوِِنه.
خِدا خَلِه چیزا رِه مسیحِ بِیَموئِنِ خَوِری، پَیغومبِرایِ وِسِّه روشِن هَکِرده مُنتا مَسیح هیچکدوم این پَیغومبِرایِ دوُره هَنتا نِیَم بی یِه وَ پِر توم ۴۰۰ سال آخِرین پَیغومِ جِه بوگذِشت بِی یه کِه زمون بَرِسِیِّه و خِدا مَسیح رِه دِنیایِ دِلِه راهی هَکِردِه. بَئیته داستان کِتابِ مُقَدَسِ جِه: کتاب پیدایش فصل ۳ و۱۲، کتاب تثنیه فصل ۱۸ آیه ۱۵،_ _کتاب دوم سموئیل فصل ۷، مزمور شماره ۱۶ و ۲۲ و ۳۵ و ۶۹ و ۴۱،_ _کتاب اشعیا فصل ۷ ایه ۱۴ و فصل ۹ ایه ۱ تا ۷ و فصل ۵۰ آیه ۶ و فصل ۵۹ آیه ۱۶و فصل ۵۳ و ۶۱، کتاب ارمیا فصل ۳۱،_ _کتاب دانیال فصل ۷، کتاب میکا فصل ۵ آیه ۲،_ _کتاب زکریا فصل از ۱۱ تا فصل ۱۲ آیه ۱۲ و ۱۳،_
کتاب ملاکی فصل ۴ آیه ۵
رایگان برای استفاده، اقتباس و اشتراکگذاری تحت مجوز باز (CC BY-SA 4.0).