۳۰- عیسی مسیح پَنج هِزارتَن رِه خِراک دِنِّه

عیسی شاگِردا رِه خَلِه دِیاتْ رایی هَکِردِه تا هَم خَوِرِه خِش رِه وِشونِ هَدِن و هَم وِشون رِه دَرس هَدِن. شاگِردا دَگِرِسِّه پِه شِه، کارا رِه عیسایِ وِسّه گِزارِش هِدانِه. اونگِدِر عیسی وِشون رِه خَلوِتی جا، دَریاچة کِنار بَوِردِه تا اَتِّ کَم دَم بَزِنِن. هَمینتاسِّه هَمه، اَتّا قایِق دِلِه سِوار بَئینِه وُ بوردِنِه اونوَرِ دَریاچِه.

مردِم تا بَدینِه عیسی وُ وِنِه شاگردا قایق رِه سوار بَئینِه وَ دَرنِه شونِنِه اونوَرِ دریاچِه، بَتِتِنه تا عیساشون نَرِسی پِه وِشون اون وَرِ دریاچه دِواشِن. هَمینتاسِّه تا عیسی وُ وِنِه شاگردا بَرسینِه؛ اَتّه خَلِه مردِم وِشونِ چِشْ بِه راه بینِنِه، هَمینتاسِّه وشونِ پیشواز بوردِنِه.

سِوایِ زَنون وُ وَچون؛ تِنا مَردا پَنج هِزار تَن بینِنِه. عیسای مسیحِ دِلْ وِشونِسِّه خَلِه بَسوتِه، چونکِه گِسپِنِ رَمِة بی چَپّونِ واری مونِّسِّنِه. هَمینتاسّه شِروع هَکِردِه وِشون رِه دَرس بِدائِن و نِخار وُ ناخِشا رِه دَرمون هَکِردِن.

نِماشونِ سَر، شاگِردا عیسایِ پیش بیَمونِه وُ وِرِه باتِنِه: «اِستا جان! مَردِمِ رایی هَکِن تا بورِن شِه وِسّه خِراک فِراهِم هَکِنِن، اینجِه آبادیِ جِه خَلِه پَرتِه، خِراک پيیدا نَوونِه.

مُنتا عیسا شاگردا ره باتِه :«شِما شِه ِوشون رِه خِراک هَدین». وِشون جِواب هِدانِه: «چِطی تومبی اَتّنِه مردمِ بِتیمِ سِر هَکِنیم؟! مُنتا تِنا پنج تا نون وُ دِ تا کِچیک ماهی دارمی، هَمی اَندِه.»

عیسی شِه شاگردا رِه بِفَرمِسّه، مَردِم رِه بَوِّین، کِهِ پنجاه تایی دَستِه دِرِس هَکِنِن وُ سُوز وُ چَمِندِ سَرْ هِنيشِن.

اونگِدِر عیسا پنج تا نون وُ دِتا ماهی رِه شِه دَستِ سَر بَیتِه و آسِمون رِه هارشیِه وخِراکِ وِسِّه خِدا رِه شُکر هَکِردِه و اون خِراکِ ره فِراوونی هِدا.

اونگِدِر عیسی نونا و ماهیا رِه رِز رِز هَکرده هِدا شِه شاگردا رِه تا مردمِ دِلِه رَسِتْ هَکنِن. شاگردا، مَردِم رِه خِراک دانِه. همه بَخِرِدِنه، و سِر بَئینِه، مُنتا خِراکایِ جِه هِچّی کَم نَئی بی یِه.

اونگِدِر شاگردا هَر چی بَمونِسِّه خِراکِ کودْ هَکردِنِه، اینطی که اون پنج تا نون وُ دِ تا ماهی جِه دِوازده تا سَوِد مَشت بَئیِه. کتابِ مُقَدِسّ جه بَئیته داستان: