۳۱- عیسی اویِ سَر راه شونِه

اونگِدِر که عیسی مَردِم رِه خِراک هِدا بَخِردِنه، شِه شاگِردا رِه بِفرمِسِّه قایق رِه سِوار بَّوِن وُ بورِن اونورِ دریاچه. مُنتا شِه تیناری هَمونجِه اَتِّه کَم بَمونِسِّه. شاگِردام اونجة جِه راه دَکتِنِه وُ بوردِنِه، عیسام اونگِدِر که مردِم رِه رایی هَکِرد بی یِه، شِه اَتّا کویِ تِک بوردِه تا راز و نیاز هَکِنِه. عیسی اونجِه تَک وُ تینار بی یِه و تا نیمه شو دعِا کِرد بی یِه.

این میون، شاگِردام سَرگَرمِ پارو بَزوئِن بینِنه، اینطی تِنِّ وا دَکِتِه کِه تا نیمِه شو نَتونِسِّنِه دریاچه رِه تا نیمِه رَد هَکِنِن.

عیسی شِه راز و نیازِ تِموم هَکرده پِه، شاگردای وَر بوردِه. وِه، وِشونِ قایقِ وَر؛ اوویِ سَر راه شی یِه.

شاگِردا کِه عیسی رِه بَدینِه، هول بَخِردِنه، وِشون گِمون هَکِردِنِه کِه وِه اَتّا روح هَسِّه. عیسی کِه دونِسِّه وِشون خَلِه هول بَخِردِنِه، وِشون رِه بِفَرمِسِّه: «هول نَخِرین، مِن هَسِّمِه»

هَمونگِدِر پِترُس، عیسی رِه باتِه: «مِه جانِ آقا، اگِه تِه شِه هَسّی، دَستور هَدِه کِه مِنِم اوویِ سَر، تِه پَلی بِی یِم» عیسائِم پِترُس رِه بِفَرمِسِّه: «بِرو»

اینطی پتُرسِم قایق جِه دَر بی یَمو وُ اُوی سَر گوم زَنون بوردِه عیسای وَر. مُنتا اَتِّه کَم که راه بوردِه، شِه دیمْ رِه عیسای جِه دِگاردنیِه وَ هَمونگِدِر وِرِه هالی بَییِّه کِه دِریو کِلّاک دارنِه وُ تِنّه وا زَندِه.

اونگِدِر پِترُسِ زَلِه اوو بَییِّه وُ هَمطی که اُوی دلِه فِرو شی یِه، شونگ کَشیِه: «جانِ آقا، مِه جانِ دَر بَوَر!» عیسی لَس نِدا، شِه دَسِ دِراز هَکِردِه و وِنه دَسِ بَیتِه وُ اوُیِ جِه وِرِه یور بیاردِه. اونگِدِر عیسی، پِترُس رِه بِفَرمِّسه: «اَی کَم بُووِر، چی چیِسِّه ِمِرِه بووِر نَکِردی که دَر اَمون بَمونی؟»

عیسی و پِترُس تا قایِق رِه سِوار بَیینِه، تِنِّه وا ناگِمون لَس هِدا وُ اوُ اِس هَکِردِه. شاگِردا کِه خَلِه ماتْ بَمونِسِّنِه، عیسی رِه پَرِستِش هَکرِدنِه و عیسی رِه باتِنِه: «راس راسّی، تِه خدایِ ریکا هَسّی» کتابِ مُقَدِسّه جه بَئیته داستان: