۳۱- عیسی اَتّا دِب بَزِه مَردی و اَتّا ناخِش زِنا یِ دَردِ دِوا کِندِه

اَتّا روز عیسی وُ وِنه شاگِردا قایق جِه بوردِنِه اَت وَرِ دیگِة دِریاچه، جَدَریانِ وَر سامونِ. خِشکی که بَرسینِه قایقِ جِه بِنِه بی یَمونِه.

اونجه اَتّا مَردی دَیّیِه که خَبیث روحا وِره گِرفتار هَکِرد بینه.

اونتا مَردی اَندِه قِددار بی یِه که هِچ کَس نَتّونِسِه وِرِه اَتّه جا بَند هَکِنِه. چَنْ کَش وِره زَنجیرِ جا دَوِس بینِه مُنتا وِه زنجیرا رِه پاره کِردِه.

اونتا مَردی، گورِستون دِله زندگی کِرد بی یِه. وِه روز و شو شونگ کَشیه. لُختِ پَتی بی یِه و شِه تَن رِه تِزِ سنگایِ جِه خِراش دائِه.

وِه هَمین کِه عیسایِ پَلی بَرِسیِه، وِنِه لینگِ بِن زانو دَکِتِه. عیسی اونتا دِبْ رِه فَرمون هِدا: «اینتا مَردیِ تَنِ جِه دَر بُور».

دِب اَتّه گَتِ شونگ بَکِشیه و باتِه: «آ عیسی، تِه گَتِ خدایِ ریکا هَسّی، مِه جِه چی چی خوانی؟ خواهِش کِمبِه مِرِه عِذابْ نَدِه» اونگِدِر عیسی اونتا دِبِ جِه بَپِرسیه: تِه نوم چی چی هسِّه؟» وِه جِواب هِدا «مِرِه لِژیون گِننِه، چونکه اِما خَلِه زیادِمی» (لِژِیون رومِ اَرتش دِلِه چَن هِزار سَرباز رِه گِتِنِه)

دِبا عیسایِ جِه خواهش هَکِردِنه: «اِمارِه اینتا سامونِ جِه یور نَکِن» اونجِه اَتّه خی گَلِّه، تَپِّة سَر چِرا کِرد بینِه. پَلیدِ روحا عیسی رِه دَسْ دامِنْ دَکِتِنِه وُ باتِنه: «پَس بی یِل اِما بوُریم خیِایِ تَنِ دِلِه» عیسی وِشون رِه اِجازه هِدا و بِفَرمِسّه: «بورین»

اَت خَلِه دِب، اونتا مَردیِ جِه دَر بی یَمونِه و بوردِنِه خی گَلّة دِلِه. تِموم اون دِ هزارتا خی، تَپِة جه لیز بَخِردِنه دَکِتنِه دریاچه دِله و خَفه بَیّنِه وُ بَمِردِنه.

خی بونا کِه اونتا گَلّه ره خی بونی کِرد بینِه تا اینتا صحنِه رِه بَدینِه، بَته بَته شهرِ وَر بوردِنه وُ عیسایِ هَکِردِ کارِه مَردِمِسّه شَرح هِدانِه. شهرِ دِلة آدِمائِم بی یَمونِه و بَدینِه کِه دِب بَزّوُ مَردی بی چِمِر، جِمه دَپوشی، سَر بِه راه اَت جا هِنیشتِه.

مردِم که خَله هول بَخِرد بینِه، عیسای جِه بخواسِّنِه اونجِه جه دَر بُوره. اونگِدِر عیسی قایقِ دِلِه بوُردِه. مُنتا هَمونتا مَردی که دِب بّزه بی یِه عیسای جِه خواهش هَکرده تا وِرِه شِه هِمکِت بَورِه.

مُنتا عیسی ِوره باتِه: «دَگِرد شِه سِره وَر و هَمه رِه بِاوُ کِه خِدا تِه وِسِّه چیکار هَکِردِه و چِطی تِره رَحم هَکِردِه.»

هَمینتاسِّه اونتا مَردیِم هَر کِجِه کِه شیِه و هر کَسِ ره کِه وینِّسِه وِشونِسِّه ِگتِه که عیسی ِونِسّه چیکار هَکِرده. هر کَسِم کِه وِنِه َسرِگذِشت رِه اِشتوسّه، خَله یِکِّه خِردِه.

عیسی دِوارِه اونوَرِ دَریاچِه دَگِرِسّه. اونجِه بَرِسی پِه، خَلِه آدِما وِره دُوره هَکِردِنه و اَتّنه مَردِمِ دِله، اونجِه اَتّه ناخِشِ زِنا دَيی بی یِه که دِوازدَه سال آزِگار زَنانِگی خونریزی داشته و جان دَر عَذاب بی یِه. وِه ِشه تِمومِ دارو نِدار ِدوا درمونِّسه خرج هَکرِد بی یِه و هِدا دکترا رِه مُنتا وِنِه ناخِشی روز به روز بَدتِر بَي بی یِه.

وِه کِه بِشتوسِّه عیسی خَلِه ها رِه دَرمون هَکِردِه، شِه پیش باتِه: «بُووِر دارمِه که مِن اگه فِقَط عیسای ِجِمِه رِه دست بَکِشِم خار بُومِه». اونتا زِنا اَتّنِه مَردِمِ دِلِه شِه خِدِرِه عیسایِ پِشتِ سَر بَرِسِنیِه وُ وِنِه بِلِندِ قِبا رِه دَست بَکِشیِه. دَر دَم وِنِه خونریزی بَند بی یَمو.

همون آن عیسی رِه هالی بَیّیِه کِه آتّا قِد و قوُّه وِنِه جِه دَر بوردِه. هَمینتاسِّه، دَگِرِسّه وُ بَپِرسیِه: «مِه قِبا رِه کی دَس بَزّو؟» شاگِردا باتِنِه: «اَت خَلِه مَردِم هَمِه وَر تِره پوس دِنِنِه، چِه چیسِّه پِرسِنی «کی مِرِه دَس بَزّو»؟

اونتا زِنا کِه تَرسِ جِه لَرزِسّه، عیسایِ لینگِ بِن زانو دَکِتِه. اونگِدِرشِه هَکِردِ کار وُ شِفایی کِه بَیتِه رِه وِرِه باتِه. عیسی زِنا رِه باته: «تِه بوُوِر تِره شِفا هِدا! بور بِه سِلامِت.» کتابِ مُقَدِسّه جه بَئیته داستان: