۳۴- عیسی اَتی داستانِ دیگه دَرس دِنِه

عیسی، خدای پادشاهیِ دَر واره خَلِه داستانایِ دیگِه رِم باته .اَتِ نِمونِه باته: «خِدای پادشاهی خَردله تیم ره موندِنِه که کِشاورز شِه لِتکا دِلِه کارِنِه. شِما خَلِه خاردونِّنی که خردله تیم کِچیکترین تیم هَسّه.»

همینتاسّه خَردلِ تیم که نوچ َزنّه همه گیاهایِ جِه گَت تر بُونه. اَنده گت ُبونه که پرنده ها وِنه چُلّة تن وُ گِلامِ دِله کِلی سازِنِنه.

عیسی اَتّا داستان دیگه ره شَرح هِدا و باته: «خِدای پادشاهی،اونتا خمیرمایه رِه موندِنه که اَتّا زِنا اون خَمیر مایِه رِه آردِ دِلِه شَندِنه تا تِمومِ خمیر هاشی بَوّه»

«خِدای پادِشاهی، گَنْج رِه موندِنِه که اَتِّ کَس وِرِه شِه لِتکا دلِه چال هَکِرد بَوِّه، اَتِّ کَسِ دیگِم وِه رِه پیدا هَکِنه و اَیْ دِوارِه وِرِه خاکِ بِن چال هَکِنه و ذاق بَکِنِه بُورِه شِه دار و نِدار رِه بَروشِه تا بِتّونِه اونتا لِتکا که وِنه دِله گَنج چال هَکِردْ بی یِه رِه بَخرینِه.»

خِدایِ پادِشاهی، اَتّا قِشنگ وُ گِرونِ میرِکا رِه موندِنه که اَتّا تاجِر وِره پیيدا هَکِردِه وَ هَرچی داشتِه رِه بَروتِه تا اونتا پولِ جا میرِکا رِه بَخرینِه.»

اونجِه اَتی آدِم دَیّیِنه که گِمون کِردِنه چون دِرِس کار هَسِّنه خِدا وِشون رِه اِشِنِه. وِشون دیگِرون رِه که خارِکار نَکِرد بیِنه رِه کِچیک وینِّسِّنه. هَمینتاسّه عیسی وشونِسّه اینتا داستان رِه شَرح هِدا: «دِ نَفِر بوردِنه پَرستِشگاه دعا هَکِنن، اَتّا پیشوایِ دینی بی یِه ، اَتّام باجگیر»

«پیشوای دینی هِرِسّا و اینطی دِعا هَکِرده: خِدا جانْ! تِره شُکر کِمّه که آدِمایِ دیگة وَنِکِتْ، گِناهکار، دِزد، ظالم، زِناکار، یا اینتا باجگیرِ وَنِکِتْ نیمِه.»

«هَفت روزِ هَفته دِ روز، روزه گیرمِه و شِه هَمة پول و دَرآمِدی که دَر اِیارمِه، هَر دَه تایِ جِه یِتّا تِره دِمبه.»

«باجگیرِم، پیشوایِ دینی جِه اَت کَم اونوَرتِر هِرِسّا و دعای گِدِر شِه سَر رِه آسمِونِ وَر راس نَکِردِه، وَ شِه سینه تَختْ رِه میس دَکِردِه وُ باته: «خِدایا مِرِه بِبَخش چونکه مِن گِناهکار هَسِّمه!»

عیسی شِه گَپِ پِه بَیتِه و باتِه: «حقیقِتِ رِه شِمسِّه گِمِه، باجگیرِ دِعا رِه خِدا بِشتوسّه و وِرِه دِرِسکار وُ پَرِیزکار بَدونِسِّه. خِدا اونایی که خِد پَسِن بَوِّن رِه کِچیک و پَست کِندِه و هَرکِس که شِه سَر رِه بِنِه بیارِه، خِدا وِرِه سَر بِلِن کِندِه».