۳۶- مسیحِ دیم دَگِرِسّه

اَتّه روز عیسی شِه شاگردایِ دِلِه سِه تا ره یعنی، پترس، یعقوب و یوحنا ره بَوِردِه اَتا بِلَند ِکویِ تِک تا هَمِتایی دِعا هَکِنِن.(یوحنایی که عیسی ره تعمید هِدا اَت کَسِ دیگه هَسّه )

دِعایِ گِدِر عیسایِ دیم اِفتابِ واری سو سو زوئه وَ وِنه جِمه اَلبِسویِ واری سُو داشتِه. اَندِه اِسبِه بَی یه که دِنیایِ دِله وِنِه وَنِکِت پیدا نَی بی یه.

اونگِدِر موسی و ایلیای پَیغُمبِر دیار بَیّنه. این دِتا مَردی چَن صد سالِ بَمونِس بی یه کِه این ماجِراها پیش بی یه، دِنیای دِله زندگانی کِردِبینه. وِشون عیسای جا گَپ َزونه کَه خلّه نَمونِسّه عیسی اورشَلیمِ دِلِه بَمیره .

اونگِدِرکه موسی و ایلیا دَینِه عیسایِ جا گپ زونِه، پترس عیسی ره باته: « خَلِه خاره که اِما اینجِه دَرِمی. بی یِل سِه تا نِسومِ کِل بِسازیم، اَتّا تِه وِسّه، اَتّا موسای وِسّه و اَتّام ایلیای وِسّه.» پترس نَدونِسّه چی چی دَرِه گِنِه ، فقط خواسّه اَت چی بَوّه.

هَنتا پترسِ گَپ تموم نی بیِ یِه که اَتّا بَل بِلِ سوُ اَبر ، بنِه سَر بیِمو و وِشونِ رِه دُوره هَکِردِه و اَبرِ دلِة جه اَتّا وَنگ بیَمو که: « وِه هَسِّه مِه جانِ ریکا که وِنِه جه خِشنود هَسِّمه. وِنه گپ ره گوش بَیرین.» سِه تا شاگردا هُول بَخِردِنه وُ بِنه دَکِتِنه.

عیسی وشونِ َسر ره دَس بِشته و باته: «هول نَخِرین ،هِرِسین .» وشون هِرِسّا پِه شِه دُورِ وَره هارشینِه، عیسی بَکِته هِچکَس ره اونجه نَدینِه.»

عیسی و وِنِه شاگردا کوهِ جه بِنه دَگِرسنِه. اونگِدر عیسی وشون ره بَفرمِسّه: « اِسا هَرچی که بَدینی ره هیچکَسِ ره نَوّین.مِه بَمِردِن نَزّیکِه و دِواره زنده بُومِه. دِمبال ِ سَر تِر تّونِنی مردِم ره بَوّین که چی چی بَدینی.» کتابِ مُقَدِسّه جه بَئیته داستان: