۳۸- عیسایِ پِشتِ خالی کِنّنِه
یهودیا هَر سال، پِسَخِ عید رِه جشن گِیتِنِه. اینتا جشن، وِشونِ یاد ایارِدِه که چِطی خِدا چَن صَد سالِ پیش، وِشون پی یِرا رِه مصرِ بَردِگی جِه آزاد هَکِردِه. نَزّیکِ سه سال بی یه که عیسی هَمة وِسّه سِخِنرانی کِرد بی یِه وُ دَرس دا بی یِه، وِه شِه شاگِردا رِه باتِه؛ خوانِه کِه پِسَخِ جَشن رِه وِشونِ هَمکِت اورشلیم دِلِه بَئیرِه. وِه هَمینطیِم باتِه کِه هَمونجِم وِره کِشِنِنه.
یَهودا؛ عیسایِ شاگرد بیِ یِه و شاگردایِ دیگة خَزانِه دار. وِه ویشتِرِ گِدِر خَزانة جِه پول دِزدی کِرده. عیسی وُ وِنِه شاگِردا اورشَلیم بَرِسی پِه؛ وِنِه شاگِرد یَهودا، پیشواهایِ دینیِ پَلی بُوردِه وُ باتِه کِه اگِه وِرِه پول هَدِن وِهِم عیسی رِه وِشونِ روشِنِه. وِه شِه دونِسِّه که رَهبَرایِ دینی عیسی رِه مَسیح نَدونِنِه وُ خواسِّنِه کِه وِرِه بَکوشِن.
پیشواهایِ دینی یَهود وُ وِشونِ گَتِ پیشوا، یَهودا رِه سی تا نُقرِه سِکِّه رِشوِه هِدانِه تا وِه عیسی رِه بَروشِه وُ وِشونِ دَسْ هَدِه؛ دِرِس هَمونطی که پَیغُمبِرون پیش پیش باتْ بینِه. یَهودا اَرِه باتِه وُ پول رِه بَئیتِه وُ راه دَکِتِه. هَمونگِدِرا وِه اَتّا خارِماقة دِمبال دَئی یِه تا عیسی رِه هَدِه وِشونِ دَسْ.
عیسی اورشلیم دِلِه، پِسَخِ عید رِه شِه شاگِردای هِمکِت جَشن بَیتِه. شامِ گِدِر، عیسی نون رِه بَیتِه لاپِّه لاپّه هَکردِه و باتِه: «بَیرین و بَخِرین، وِه مِه تَن هَسِّه که شِمِسِّه فِدا بُونه. مِه یادِگاری بِجا بیارین.» اینطی بَیِ یه که، عیسی باتِّه وِشونِسِّه شِه جان رِه دِنِّه و وِنِه تَن وشونِسِّه قِربونی بُونه.
اَی عیسی اَتّا شرابِ پی یَلِه رِه بَیته و وشون ره باتِه: «اینتا مِه خون هَسِّه؛ نُو پَیمونِ وِسِّه که شِمِه گِناهای آمِرزِشِ خاطِری بَشِنی بوُنِه، وِرِه بَخِرین. پَسون، اینتا کارِه مِه یادِگاری بِجا بیارین.»
اَیِّم عیسی شِه شاگِردا رِه باتِه: «شِمه دِله اَتِّ کَس مه پِشت رِه خالی کِنّه.» شاگردا هاج وُ واج بَمونِسِّنِه، بَپِرسینه کِمینتا اینکارِ کِنده. عیسی باتِه: «اونتایی که اینتا لاپِّه نون رِه مِه جِه گیرنِه مِرِه روشِنِه». هَمونگِدِرِم نونِ رِه هِدا یَهودایِ دَسْ.
یَهودا نون رِه بَیتِه په، شِیطون وِنِه دَرون بُوردِه. وِه یَهودیایِ سَرونِ پیش بُوردِه تا وِشون رِه کُمِک هَکِنِه، عیسی رِه گیر دِمب هَدِنْ، اینا هَمِه شودِلِه پیش بی یَمو.
عیسی وُ وِنِه شاگردا شوم بَخِردِ پِه، زِیتونِ کویِ وَر رایی بَئینه. عیسی باتِه: «اَمشو شِما هَمِه مِرِه تینار اِلِّنِنی. چونکِه بَنوِشتِه بَئیِه: «چَپّون رِه زَمبِه و گِسفِنا هَمِه رَتّ وُ رَم بُونِنِه.»
پِترُس باتِه: «اَگِم هَمه تِرِه تینار بِلِّن، مِن تِرِه تینار نَلِمِّه.» عیسی وِرِه باتِه: «شِیطون خوانِه شِما هَمِه رِه شِه وَر بَکِشِه، مُنتا مِن تِسِّه دعا کِمبِه تا تِه بووِرْ فِنا نَوِّه. هَمین تِه؛ اَمشو بَئیتِه تا طِلاوَنگ، سه کَش مِرِه رَد کِندی و گِنی مِرِه نِشناسِنی.»
پِترُس عیسی رِه باتِه: «اگِه بَمیرِمِم تِرِه رَد نَکِمّه.» شاگِردایِ دیگِم هَمینتا گَپِ رِه بَزّونِه.
اونگِدِر عیسی وُ وِنه شاگردا جتسیمانیِ لَتِّه وَر بوردِنه. عیسی وِشون ره باتِه دعا هَکِنین که شِیطون شِما رِه گول نَزِنه، هَمینتاسّه وِشون پَلی جِه بوردِه تا اَتِّ جا شِه تِناری نیایِش هَکِنه.
عیسی سِه کَش اینطی نیایِش هَکِرده: «آ جانِ پی یِر!، اجازه هَدِه این پی یَلة دَرد و رَنج رِه سَر نَکِشِم، اَگه اَتِّه راهِ دیگه دَنیِه که مَردِمِ گِناه رِه بیامِرزی، پس هَمونطی کِه تِه خواسِّه هَسِّه پیش بی یه.» عیسی اَندِه آشوب بی یِه که وِنه صِوالِ تَخت عَرِق خِدِه خون رِه مونِسّه. خِدا اَتِّه فِرشته رِه راهی هَکِردِه تا عیسی رِه ویشتِر تِوان هَدِن.
هر کَش کِه نیایِش کِردِه، عیسی اَی شِه شاگردای پَلی ایَمو، مُنتا وینسّه کِه وِشون هَنتا بَخِتِنِه. سِیِّمِ مین کَش که دَگِرسِّه، باتِه: « هِرِسّین، اونتا شاگِردکه مِه پِشت ره خالی هَکرده وُ مِره بَروته، اینجه دَرِه.»
یَهودا، پیشواهای ِ یَهودی وُ سَربازا و اَتِّ خَلِه مَردِمِ هِمکِت بیَمو. وِشون شِه هِمکِت شمشیر و دستِ چو داشتِنِه. یهودا عیسای پیش بیَمو و باتِه: «سِلام اِستا» و وِرِه خِش هِدا. اینتا کار سَرون یَهودیِسّه اَتّا نِشونه بی یه تا وِشون عیسی رِه َبِشناسِن. عیسی وِرِه باته: « یهودا یِتّا خِشِ جا مِره روُشِنی؟»
اونگِدِر که سربازا عیسی رِه گیر دِمبِدانه، پترس شِه شمشیرِ دَر بیاردِه و گتِ پیشوای نوکِر گوش رِه بَورییِه. عیسی وِرِه باته: «شِه شمشیرِ بی یِل وِنه جا سَر . مِن تومبِه شِه پی یِر جِه بِخوام که اَتّا اَرتِش فِرِشتِه رِه مِه یاری بَرِسِنه. مُنتا وِنِه که شِه پی یِر گَپ رِه فَرمون بَوِرِم» عیسام اونتا مَردیِ گوش رِه شِفا هِدا و شاگردا همه دَر بوردِنِه. کتابِ مُقَدِسّه جه بَئیته داستان:
انجیل متی فصل ۲۶ آیه های ۱۴ تا ۵۶، انجیل مرقس فصل ۱۴ آیه های ۱۰ تا ۵۰، انجیل لوقا فصل ۲۲ آیه های ۱ تا ۵۳، انجیل یوحنا فصل ۱۸ آیه های ۱ تا ۱۱
رایگان برای استفاده، اقتباس و اشتراکگذاری تحت مجوز باز (CC BY-SA 4.0).