۳۹- عیسای باز پُرسی

نیمه شو، سَربازا عیسی رِه گَتِ پیشوایِ سِره بَوِردِنِه تا وِنِه جه چِکِلِ پِرسی هَکِنِن. پِترُسِم اَتی دِمبال تِر وِشونِ پِشتِ سَر اییَمو و عیسی رِه کِه سِرة دِله بَوِردِنِه، پترُس اون سِرِة دَرِه پِشت تَشِ وَر اِس هَکِرد بی یِه تا شِه خِدِره گَرم هَکِنه.

سِرِه دِلِه، سَرونِ یِهودی عیسایِ جه چِکِلِ پِرسی کِردنِه. وِشون اَتِ خَلِه دِراغی شاهِدا رِه بیاردِنِه کِه اَلِکی عیسی رِه بُهتون زونِنِه. مُنتا وِشون گَپ هِدی جا ،جور نَیّه، هَمینتاسّه سَرونِ یَهودی نَتّونِستِنِه عیسایِ گِناه رِه وِنه گِردِن دِمبَدِن. عیسام لام تا کام گَپ نَزّو .

آخِر سَر،گَتِ پیشوا عیسی رِه هارِشیه و باتِه: «اِمارِه بِاُو کِه تِه هَمون مسیح ، خِدایِ زِندِة ریکا هَسّی یا نا؟»

عیسی باته: «اَرِه هَسّمِه، و اَتّا روز مِرِه وینِّنی که خِدایِ راسِ دَس هِنیشتِمِه و آسِمونِ جِه دِواره بِنِه اِمبه.»گَتِ پیشوا، که عیسایِ بَزِّه گَپِ جِه وِرِه خَلِه غِظ بَیت بی یِه، شِه جِمِه رِه چاک بَّزو و شونگ بَکِشیه وُ پیشواهایِ دینی رِه باتِه: شاهِدایِ ویشتِر دیگه نِخوامی اِما. هَمه بِشتوسِّنه کِه وِه باتِه مِن خِدایِ ریکا هَسِّمه.اِسا شِمِه رای چی شیه؟»

سَرونِ یَهودی هَمه ،گَتِ پیشوا رِه جواب هِدانِه: «وِنه سِزائه کِه بَمیرِه.» هَمینتاسّه عیسایِ چِش رِه دَوِسِّنه. وِنِه ديم ره فِلیک دِم هِدانِه، وِرِه دَروشتِنِه و دَس دِمبدانِه.

پترُس سِرة دَر پِشت اِس هَکِرد بی یِه. که هَمون سِرهٔ دَس مَره وِرِه بَدیه و باتِه: «تِئم عیسایِ هِمکِت دَئیی» پِترُس گِس نِدا وِره ، اَت کَم بوگذِشتِه په، اَت دیگِه دَسمَره هَمینتا گَپِ وِرِه بَزّو و اَی پِترُس نِشتوس بَئیته. دَس آخِر آدِمایی کِه اون دُور و وَر دَیّینِه وِرِه باتِنِه: «اِما دومبی کِه تِه عیسایِ شاگِرد هَسّی، چونکِه تِئم جَلیلی هَسّی.»

اونگِدِر پترُس خِدا رِه گِوا بَیتِه وُ باتِه: «خِدا مِرِه بَکوشه اَگه مِن اینتا مَردی رِه بِشناسِم.» هَمون دَم طِلا ونگ بَزّو وُ عیسی دَگِرسه پِترُسِ هارِشیه.

پترُس بوردِه وگِلِم گِلِم اَسلی بَشِنیه. هَمونگِدِرِم ، یهودا کِه وِنِه پِشتِ خالی هَکِرد بی یِه تا بَدیه کِه یَهود گَت گَتون عیسایِ بَکوشتن ره مُهر َکِردِنه . اَنده غم و غِصه وِرِه سَر بَیتِه که بورده شِه خِدِرِه بَکوشتِه.

هَمونروزا پیلاتُس کِه رومی بی یه وَ یَهودایِ فَرمونداری وِنِه دَس دَی بی یه. سَرون یَهودی عیسی رِه وِنِه پیش بَوِردِنِه. وِشون خواسّه بی یِه کِه پیلاتُس عیسایِ بَکوشتِن رِه اِمضا هَکِنِه. پیلاتس عیسیایِ جِه بَپِرسیه: «تِه یَهودِ پادِشاه هَسّی؟»

عیسی جِواب هِدا: «دِرِس باتی.مُنتا مِه پادِشاهی، دِنیایی نی یِه. اَگِه اینطی بَی بُو ، مِه هِوا خواها مِه وِسّه جنگ کِردِنِه. مُنتا مِن دِنیایِ دِلِه بیَمّه تا راسّی ره خِدایِ دَرواره هَمیِسّه بَوّم. هَر کَس کِه راسّی رِه دوس دارِه مِه گَپِ رِه گوش کِنِده.» پیلاتُس بَپِرسیه: « راسّی چی شیه؟»

پیلاتُس عیسایِ جا گَپ بَزّو ، پِه مَردِمِ پَلی بُوردِه و باتِه: « مِن اینتا آدِمِ جِه گِناهی نَدیمِه کِه وِنه وِره بَکوشِم.» مُنتا سَرونِ یِهودی و مَردِم داد زونِنه و گِتِنِه: « صَلیب بَکِشین وِرِه.» پیلاتُس جِواب هِدا: «وِه گِناهکار نی یِه» مُنتا مَردِم این کَش بِلِنتِر داد بَزّونِه و باتِنِه. اَی سِیِّمین کَش پیلاتُس باتِه: «وِه گِناهکار نی یِه.»

پیلاتُس بَتِرسیه که نَکِنِه شورِش بَوِّه، هَمینتاسّه وِشون رِه اَرِه باته و عیسی ره شِه سَربازایِ دَس هِدا تا وِرِه صلیب ِ دارِ تن چار مِخ بَکِشِن. روُمِ سَربازام عیسی رِه شِلاقِ جِه دَروشتِنه وُ رَختِ شاهی ره وِنِه تَن دَکِردِنِه و تَلیِ جِه تاج دِرِس هَکِردِنِه و وِنه سَر بِشتِنِه. وِرِه دَس دِمبِدانِه و گِتِنِه: «زندِه بَمونه یَهودِ پادِشاه» کتابِ مُقَدِسّه جه بَئیته داستان: