۴۰- عیسی صَلیبِ دار بورده

سَربازا عیسی رِه دَس دِمبِدا پِه، وِرِه یور بَوِدِنِه تا صَلیب بَکِشِن. وِشون عیسی رِه زور هَکِردِنِه کِه شِه صلیبِ چو رِه شِه دوشِ سَر بَوِرِه.

سَربازا عیسی ره اَتّا جا بوِردِنه که اونجِه رِه جُلجُتا گِتنِه (یعنی سَرِکاسه ) عیسایِ دَس و پِه رِه صلیبِ دارِ تَن مِخ بَزونِه. مُنتا عیسی باتِه: «پی یِر جان! مردِم گِنا رِه بِبخش، چونکِه وشون نَدونِنِه دَرِنِه چیکار کِننِه.» پیلاتس دَستور هِدا عیسای سرِ بالا اَتّا تَختِه بِشتِنِه که وِنِه پِشت بَنوِشت بی یِه: وِه یهودِ پادشاه هَسِّه.

اونگِدِر سربازا عیسای رَخت وسِّه قرعه دِمبِدانِه. اینتا کارِ جا کتاب مقدسِ پیشگویی دِرِس دَر بیَمو که گِنِه: «مِه رَختِ رِه بوسِّنینه، شِه میون رَسِت هَکِردنِه و مه قِبایِسّه قرعه دِمِّبِدانِه.»

سَربازا همونگِدر، دِتا دِزد رِم صلیبِ تَن چارمِخ بَکِشینه و عیسی رِم وِشون دِ تایِ میون صلیبِ دارِ تَن چار مِخ بَکِشینِه. اَتّا دِزد عیسی رِه دَس دِمدا، مُنتا اون اَتّا دِزدِ وِرِه باتِه:«تِه خِدایِ جِه نَتِرسَنی؟ اِما گِناهکارِمی مُنتا اینتا مَردی بیگِناه هَسّه» هَمونگدِر عیسی ره باتِه: «عیسی! شِه پادشاهی دِله مِره شِ یاد بیار.» عیسی وِره جواب هِدا: «تِه همین اَمروز مِه هِمکِت، بِهشتِ دِلِه دَری»

یَهودِ دینِ گَت گَتا ومَردِمی کِه اونجِه دَی بینِه عیسی رِه دَس دِمبّدانِه وَ گِتِنِه: « تِه اگِه خِدایِ ریکا هَسّی، صلیبِ دارِ جِه بِنِه بِرو و شِه خِد رِه آزاد هَکِن! اون ماقع اِما تِره بوُوِر کِمبی.»

دِرِسّه کِه چاشتِ گِدِر بی یه، مُنتا اون دور و وَرایِ آسِمون سیو وُ کَهو بَییّه. اینتا سیویی سه ساعِت بَکِشیه.

اونگِدِر عیسی شونگ بَکِشیه: «تموم بَیّیه. پیِ یِر جان، شِه روح رِه تِه دَس دِمبّه.» اونگدِر وِنه گِس دَکِتِه وشِه سَر جِر بیاردِه وشِه روح رِه خِدایِ دَس بِسپارِسِّه. اونگِدر که جان دَر هدا بِنه ره لَرزه دَکِته وُ پَرِستِشگاهِ گتِ پرده( یا هَمون قدس الأقداس) کِه مَردِمِ رِه خِدایِ جایگاهِ جِه جِدا کِرد بی یِه ، بِن تا بالا لاپ بَخِرده وُ بوسّه.

عیسی شِه مرگِ جا اَتّه راه وا هَکرده تا مَردِم بِتونِن وِنه پِشتی خدایِ پیشگاه بی یِن. اَتّه رومی پاسِبون کِه اینتا پیش آمِد رِه بَدیه، باتِه: «راس راسی کِه اینتا مَردی بی گِناه بی یِه و خِدایِ ریکا هَسِّه»

اونگِدِر دِ تَن سَرونِ یهودی، نیقوُدیموس و یوسِف نوم که بوُوِر داشتِنِه عیسی هَمون مَسیحْ وعده بَئي هَسِّه، پیلاتُسِ پیش بوردِنِه وُ عیسایِ جِنازه رِه وِنِه جِه بِخواسِّنِه. وِشون عیسایِ تَن رِه اَتّا کَتونِ پارچة جا دَپیتِنِه و آرِمْگاهِ دِلِه که غارِ واری بی یِه بِشتِنِه، اَتّا گَتِ سَنگِم آرِمْگاهِ دَرِ سَر پِتی هِدانه کِه دَوِسْ بَوشه. کِتابِ مُقَدِسّ جه بَئیته داستان: