۴۱- خِدا عیسی رِه مِردِه هایِ دله جِه راسْ کِنده

سَربازا کِه عیسی رِه صَلیب بَکِشینه، گَتْ گتایِ یهودی پیلاتس َپلی بوردِنه و باتِنِه: «عیسی دِرو باتِه که سِه روز بَمردِه پِه اَی زِنده بوُنه، هَمینتاسِّه که عیسایِ شاگِردا نَتونِن وِنِه جِنازه رِه دِزدی هَکنِن، وِنِه کِه یِتّا آدِم رِه سِه روزِ تِموم آرِمگاهِ دُور وُ بَر پاسِبونی هَکِنِن. اَگِه بِتونِن جِنازه رِه بِلِن هَکِنِن بَوِرِن، اونگِدِر اِشتِلِم کِنِنه که بَمِردِه آدِم دِوارِه زِندِه بَئییِه.»

پیلاتس باته: « چَن تا سَرباز شِه هِمکِت بَوِرین آرِمگاه دَرِسَر و تا تِوان دارنِنی َهَمونجه پاسِبونی هَکِنین.» اونگِدِر وِشون، آرِمگاه سَنگِ وِرودی رِه نِشون بَزّونِه و سربازا رِه بِشتِنِه هَمونجه تا پاسِبونی هَکنن که هِچ کَس نَتونِه اونجهٔ جه جِنازه ره دِزّی هَکِنه.

اَتّه روز بوگذِشتِه وُ عیسی رِه خاک هَکِردِه پِه، شَبّات یا هَفتِمین روز هَفتِه بیِ یِه کِه هِچ کاری نَوِسِّه هَکِنِن. عیسای رَفِقا هیچکِدوم نَتونِسِّنه آرِمگاه بُورِن. مُنتا صِواحی سَر، چَنتا زنا شِه خِدرِه آماده هَکِردنِه که عیسای آرِمگاه دِلِه بُورِن و شِه رسم واری، عیسایِ جِنازِه رِه خِشبو هَکِنن.

زَنون اونجه نَرِسی پِه، اَتّه گَتِه زَمین لَرزة آرِمگاه کِنار پیش بیَمو و اَتّا فِرِشتِه آسِمونِ جِه بِنِه بیَمو، آرِمگاه سنگِ وِرودیِ رِه وَر هِدا وُ سنگِ سَر هِنیشتِه. اونتا فرشته اَسمونِ اَلبِسویِ واری سوسو زوئِه. پاسبونا که وِه ره بَدینِه اَندِه بَتِرسینِه و هول بَخِردِنِه که اَتّا مِردة وَنِکِتْ بِنِه دَکِتنه.

اونگِدِر کِه زَنون آرِمگاه بَرِسینِه، فِرِشته وِشون رِه باتِه: «هول نَخِرین، عیسی اینجِه دَنیِ یه. وِه همونطی که بات بیِ یِه، بَمِرده پِه مِردِه هایِ دلِة جِه هِرِسّا. «بی یین آرِمگاهِ دِلِه رِه هارِشین.» زَنون آرِمگاهِ دِلِه رِه هارِشینِه و هَمونجِه کِه عیسایِ جِنازِه رِه بِشت بینِه رِه بَدینِه، مُنتا جِنازِه رِه پيدا نَکِردِنِه.

اونگدِر فرشته زَنون ره باتِه: «بُورین شاگردا رِه بَوّین کِه عیسی مِردِه هایِ دِلِه جِه هِرِسّا، و شِمِه تون زودتِر جَلیل رِسِنه»

زَنون هَمینطی کِه هاج و واج وُ خِشحال بینِنه، شاگِردایِ وَر بوردِنِه تا خَوِرِ خِشِ وِشون رِه هَدِن.

هَمطی که زَنون بَتِج بَتِج شاگردای ور شینِنه تا خَوِرِ خِش رِه هَدِن، ناگِمونی عیسی وشون چِشِ پیش دیار بَییِّه. وِشونِم ساق دَکِتِنِه وُ شِه صُوال رِه بِنِه بِشتِنِه. عیسی وِشون رِه باتِه: «هول نَخِرین! بُورین وُ مِه شاگردا رِه بَوّین کِه جلیل بورِن، هَمونجه تونِّنِه مِرِه بَوینِنْ.» کِتابِ مُقَدِسّ جه بَئیته داستان: