۶- خدا ایساقِ وسّه جوُر کنده

اونگِدِر که ابراهیم پیر بَیْ بی یِه وُ وِنِه ریکا ایساق جوون، ابراهیم شِه اتّا پیشکار شِه زادگاه رایی هَکرده تا وِنه قوم وُ خیشِ دِلِه ایساقِسّه زَن بَیره و شِه هِمکِت بیاره.

پیشکار خَلِه دِرِه راه بوُردِه تا ابراهیمِ قوم وُ خیشِ پَلی بَرسیه، خِدا اونتا پیشکار ره رِبِکای وَری بَکِشیه. ربکا ابراهیمِ برارِ نَوه بی یه.

رِبِکام اَره هِدا که ِشه خِنِواده رِه تَرک هَکِنه وُ پیشکارِ هِمکِت ایساقِ سِرِه بُوره. همینکه وِه بَرِسیِه ایساق وِنِه جا عروسی هَکِردِه.

خَلِه زَمون بوگذشته، ابراهیمِم بَمرده و خِدا شِه پَیمونِ خاطری که ابراهیمِ جا دَوِس بی‌یه، ایساق ره فراوونی وُ برِکِت هِدا. اتّا وَعدِه که خِدایِ عَهد وُ پَیمونِ دِلِه دَئی بی یه اینتا بی یِه کِه اِبراهیمِ تِوارِ بی اَندازِه زیاد بوُنه. مُنتا ربکا، ایساقِ زنا نَتونِسّه وَچه دار بَوّه.

خدا اجازه هِدا ایساقِ دعایِ جه رِبِکا دِگِلی سنگین بَوّه. اون دِتا وَچه هنتا دِنیا نی‌یَم پِه، مارِ اِشکِم دِلِه دیِی جا جنگ داشتِنه و همینتاسّه رِبِکا خدا جِه بَپِرسیه، چی شی وِسّه اینطی بونه.

خِدا رِبِکا ره باتِه: «تِه، دِتا ریکا دِنیا ایارنی. وِشون دِ تایِ جِه دِ جور قُوم بِه وِجود اِنه. وشون همیشِه دیی جا جنگ دارِنِنه، اّما گَتِ ریکایِ قوم خُردِ برارِ قومِ جِه فَرمون وَرنه.

رِبِکایِ ریکائون که دنیا بی یَمونه، گَتِ ریکا، سِرخه رو بی‌یه و ونه تَن و پِه اَنده می داشته که ونه نوم ره عیسو بِشتِنه. وِنه پشتِ سر خُردِ ریکا همینطی که شِه برار عیسویِ لینگِ کابِ بَئیت بی‌یه، دنیا بی یَمو. ونه نوم رِم یَعقوب بِشتِنه.