۷- خِدا یعقوب رِه فِراوونی دِنّه

اون دِتا ریکام گَت بَئی نه. عیسو شِکاردوست داشتِه ، مُنتا یَعقوب سرهِ دِلِه دَی بی یِه. رِبِکا یَعقوبِ رِه ویشتِردوست داشتِه و ایساقِم عیسو رِه.

اَتّه روز؛ عیسو وِشنا و تِشنا شکارِ جِه دَگِرسّه ،یَعقوب رِه باتِه: «اَت کَم شه خِراکِ جه، مِرِه هَدِه» یَعقوب وِرِه اینطی جواب هِدا: «تِه ونه مِره قول هَدی، شِه حقِّ گَتّریِ که تِه زودتِر دِنیا بیَموئِنِ وِسّه تِرِه رِسِنِه رِه مِرِه بِبَخشی» اونگِدِر عیسوِم قِرار بِشته که شِه حَقِّ گَتِّری رِه هَدِه یَعقوبِ. یَعقوبِم ِشه خِراکِ هِدا وِرِه.

اونگِدِر که ایساق خواسّه شِه برکت رِه هَدِه عیسو رِه، رِبِکا وِره کَلِک بَّزو وَ یَعقوب رِه عیسوی جا رایی هَکِرده پی یِرِ اتاقِ دِله. ایساق پیر بی ِیه و نَتونِسّه خَلِه خار بَوینه. یَعقوب عیسوی رَخت رِه شِه تَن دَکِرده و شِه دَسّ وُ گِردنِ بِزِ پوستِ جا دَپوشِنیه.

یَعقوب شِه پِی یِر پَلی بی یَمو وُ وِره باتِه: « مِنِمه، تِه عیسو، اِسا بی یَمّه کِه مِره برکت هَدی» ایساق که بِزِ می رِه دَس بزوئه و اتِه کَمِم بو بَکِشیه، شِه پیش گِمون هَکرده که عیسو وِنه پَلی بیَ یِمو و وِرِه برکت هِدا.

عیسو یَعقوبِ جِه بیزار بی یِه، چونکه یَعقوب وِنِه حَقِّ گَتِّری رِه بَدِزّیه. هَمینتاسّه وِهِم نَقشِه دَچیّه که ایساقِ بَمِرده پِه، یَعقوب رِه بَکوشِه.

مُنتا رِبِکا وِنِه نَقشِه ره بَخونِسّه . هَمونگِدِر وِه وُ ایساقِ ، یَعقوب رِه دِرِه راه؛ رِبِکایِ خِنِوادِة پَلی رایی هَکِردِنه.

یَعقوب خَلِه سال رِبِکای خِنِوادِة پیش زِندِگانی هَکِرده. همونگِدرَام زَن بَوِرده و دِوازدَه تا ریکا و اَتّا کیجا بیارده. خِدام وِره خَلِه فراوونی و سَرمایه هِدا.

بیست سالِ آزِگار که یَعقوب شِه سِرِه و کَنعانِ جِه سیوا بَی بی یِه ،دِواره شِه وَچون و نوکِرِ و شِه گِسفَنِِ رَمِهٔ هِمکِت دِوارِه کَنعان دَگِرِسّه.

یَعقوب خَله تَرس داشته؛ چونکه گِمون کِردِبی یِه،نَکِنه عیسو هَنتا خوانِه وِره بَکوشِه. هَمینتاسّه شِه گَلّه و رَمِهٔ دلِه اتِّه خَله پیشکَشی حیوون عیسویِ وِسّه رایی هَکرده. اونتا خِدمِتکار که رَمِه رِه عیسوی پَلی بَوِرد بی یِه، وِرِه باته: «اینتا رَمِه ره ته خِدمِتگِزار، یَعقوب شِمِسّه پیشکِش هَکِرده و شِه هِم خَله زود اینجه رِسِنه .»

مُنتا عیسو دیگه نِخواسّه یَعقوبِ سَر بِلایی بیاره وَ ونِه بَدی یِنِ جِه خَلِم خِشال بَّیه. یَعقوب کَنعانِ دِلِه آسودِه وُدِلِ خِش زندگانی کِردبی یِه. ایساق که بَمرده؛ عیسو و یَعقوبِ وِره چال هَکِردِنِه . اون عَهد وُ پَیمون که خِدا ابراهیمِ جا دَوِس بی یه، ایساق بَمِرده پِه یَعقوب ره بَرِسیه.