۹- خِدا موسی رِه شِه پیش بَخونِسِّه

یوسِف بَمِرده پِه وِنه خِنوادِه مِصرِ دِله مونِسّه گار بَیّینه. خله سال وشون وُ وشونِ وَچونْ همونجه زندگانی کِردِنه وُ خَلِه وَچِه بیاردِنه. مصریام وِشون رِه اسراییلی وَنگ کِردِنه.

چَن صَد سال بوگذِشته پِه، اسراییلیِا خَله زیاد بَی بینه. مصریام دیگه یوسِف وُ وِنِه کارا رِه شِه یادِ جِه بَوِرد بینِه. وشون اسرایلیایِ جه تَرسینه چونکه َخله زیاد بَی بینِه. هَمینتاسّه اونتا فرعون که مصرِ پادِشاه بی یِه، اسرایلیا رِه مصریایِ نوکِر و بَرده هَکِرده.

مصریا، اسراییلیا رِه وادار کِرد بینه که وِشونِسّه سِرا وُ کاخ وُ حتّی وِشونسّه اَتِّ خَله شهر بِسازِن. سَنگینِ کارِ جه، اَتِّه مِنّیکْ آسایِش وُ آرامِشْ وِشونِسِّه نَمونِسْ بی یِه و زِندگانی رِه وِشونِسِّه تَلْ هَکِردْ بی یِه.

فرعون بَدیِه که اسراییلیا ََخله وَچِه کِنّنِه، هَمینتاسّه ِشه قوم ره دَستور هِدا که اِسراییلیایِ چِلیک وچونِ دله فقط ریکائون ره نیلِ روخنة دله دِم هَدِن و بَکوشِن.

همونگِدِر اَتّا اِسراییلی زِنا یِتّـا ریکا دِنیا بیاردِه. وِه وُ وِنه مَردی؛ اَندِه کِه تونِسِّنه چِلیک وَچِه رِه جا بِدانِه.

دیگه چِلیکِ وَچة پی یِر مار نَتّونسِنه وِره جا بَدِن، چونکِه خواسِّنه وِنِه بَکوشتِنِ جِلو ره بَیرِن، چِلیک وَچِه رِه اَتّا سَوِدِ دله اُویِ سَر بِشتِنه و نیلِ روخِنه وَر، لَلـِه جارِمیون رِها هَکِردِنه. مُنتا وِنِه گَتِ خواخِر وِره دیاری جِه اِشائِه تا بَوینه بِرارِ سَرچی اِنه.

فرعونِ کیجا سَوِد رِه بَدیِه و وِنِه دِله ره هارِشیه. چِلیکِ وَچِه رِه که بَدیِه، به عِنوانِ شِه ریکا قبول هَکِردِه. وِه اَتّا اسراییلی زِنا رِه شیری مار بَیتِه تا وَچِه رِه شیر هَدِه. مُنتا وِنِه رُوحِم خَوِر دار نَیْ بی یِه که اینتا زِنا هَمون وَچِة مار هَسِّه. مارِم که وَچِه رِه شیرِ جِه بَیته، اَیْ دِوارِه فرعونِ کیجا رِه بَر دِگاردِنیه و فِرعونِ کیجا، وَچة نومْ رِه موسی بِشتِه.

موسی کِه گَت بَیِّه، اَتّا مصری رِه بَدیِه که اسراییلی برده رِه دَرِه روشِنه و کِتِک زنّه. موسام دَته بَتِه دَکِتِه که شِه اسرائیلی برارِ جانِ سَر دَکِفه وُ وِرِه نِجاتْ هَدِه.

موسی گِمون هَکِرده که هیچکَس وِره نَوینه، اونتا مِصری رِه بَکوشْته وُ وِنه نَعشْ رِه جا بِدا. مُنتا اَتّا نَفِر وِنِه کارِه بَدیِه.

فرعون موسایِ کارِ جه آگاه بَیِّه و خواسِّه که موسی رِه بَکوشه. مُنتا موسی مِصرِجه اَت بیابونِ وَر دَربورده وَ ِفرعون سربازا نَتّونِسِنه وِره اونجِه گیر بیارِن.

موسی مصرِ جه دَر بوئرده و بیابونِ دله ، چَپونیِ سَرگَرم بَیّه. همون سرزمینِ جِم زَن بَیتِه وُ دِتا ریکایِ پی یِر بَیِّه.

اَت روز که موسی شه زَن پی یرِ گِسفِن گَلّه ره چِرا بَوِرد بی یه، لَم دِلِه بَدیه که تَش اَلو دارنه مُنتا نَسوزِنه. هَمینتاسّه تَشِ تَنِ وَر بورده تا بَدونه چی شی وسّه اینطیه. موسی که تَشِ وَر بورده، خِدا لَمِ دله وِره وَنگ هَکِرده وُ باته: «شه کَلوشِه لینگِ جه در بیار، چونکه اینجه که اِس هَکِردی پاک و مُقَدسّه.»

اونگِدِر خدا باته: « مِن ِشه قوم ِ زار و بِلا ره مصر دله بَدیمه. ِ اِسا من ِتره فرعون پیش رایی کِمبِه تا مِه قوم ره مصرِبردگی جه آزاد هَکِنی. ِمن کَنعانِ سرزمین ره وشونِ بَخشِمبه، َهمونتا سرزمین که وِنه وعده ره ابراهیم و ایساق و یَعقوب ره هِدا بیمه.»

موسی باته: اَگه قوم مِه جه بَپِرسِن که کی تِره رایی هَکِرده، وشون ره چی شی بَوّم؟ خِدا بِفَرمسّه: « هسّمه همینکه هَسّمه. وِشون ره بِاوُ هَسّمه مِره شِمه پَلی بَرِسِنیه. اَیِم وشون ره باوُ که مِن یَهُوَه شِمه پی یِرونِ خِدا، ابراهیم، ایساق و یَعقوبِ خِدا هَسّمه. مِه نوم هَمیشِهٔ وسّه هَمینتائه.»

موسی نِخواسّه که فرعونِ پیش بوره ، چونکه ترسیه نَتونِه خارگَپ بَزِنِه، هَمینتاسّه خِدا موسایِ بِرار هارون ره ِونه هِمکِت رایی هَکِرده تا وِنه وَردس بَوّه.