۳۱- عیسا دیمی اُوْوین رِه مِشو
بَعدی اِنی کو عیسِه جَمی یِتی چی هادا، هُشتُن شاگِردُنَه باتِش کو لاکِما سوآر بین و بَشین اون طَرِفی دِریاچِه. اَمّا اُ اونجو بِمُند تا شاگِردی بِشِن عیسِه بَعدی اِنی کو مَرتُمُن رَوُنَه کِرد، بِشا کَلِّهای کوهی کو دا هاکِرِه. اُ اونجو تُنییا با وُ تا نِصفی شُوْ دا ماکِردِش.
دِر اِن مییُنَه، شاگِردی، دِلَه لاکِمِن، دِرشُن پارو موکوآشُّن اَمّا وایی مُخالِفی مییِما وُ تا نِصفی شُوْ، فَقِد نِصبی دِریاچِه پی رَد بابِن.
اون وَخت عیسِه هُشتُن دا تَمُم کِرد و بِه طَرِفی شاگِردُن بِشا. اُ دیمی اُوْوین رِه بِشا تا بِه لاکِمِن بِرِسا.
وَختی شاگِردُن عیسِه بِدییا، خِلی بِتِرسِن. چون فِکر ماکِرشُن ای روحَه. عیسِه بِفِما کو اونی بِتِرسِچَن. پَس ژُنَه باتِش: «نَتِرسین، اَیون!»
بَد پِطرُسی عیسِه رَه بات: «آقا جان، اَگِر توئِه، اَمر هاکَه تا اَیَن دیمی اُوْوین پی تَه طَرِف بییون.» عیسِه، پِطرُسی رَه بات: «بیا!«
بَد پِطرُس لاکِمِن پی بیرین اِما وُ دیمَه اُوْوین بِه طَرِفی عیسِه رِه کِت. اَمّا چُند قَدَم کو بِشا، ژو هُشتُن دیم، عیسِه پی وِرگاردِنا وُ ژو حِواس بِه طَرِفی مُوْجُن و طیفُنی بِشا.
اون وَخت، پِطرُس بِتِرسا وُ هَمِنطُوْ کو دِلَه اُوْوین هی مِشا، فِریا بِتِش: «آقا مو نِجات بَدِه!» عیسِه جَلدی دَس دِراز وا کِرد و ژو بیرین اِوِردِش. بَد عیسِه پِطرُسی رَه بِفِرما: «چِرَه تَه ایمُن کَمییَه، چِرَه بِه مو اِعتِماد ناکِردَه تا راحِت با؟»
وَختی پِطرُس و عیسا لاکِما سوآر بِن، طیفُن بِشتا وُ دِریا آرُم وابا. شاگِردی کو اِلَه لوچ بِبابِن، عیسِه پِرِستِش هاکِرشُن، ژو رَه باشُّن: «ستینَه کو تو خُدِه پیرِه «
آستُنِکَه وِتَه بِبا کِتابی مُقَدِسی پی اِنجیلی مِتِه فَصلی چاردِه، آیِه ای ویستَه دوئی تا سییَه هِرَه، اِنجیلی مِرقِسی فَصلی شَشی آیِه ای چِلَه پَنجی تا پَنجاوُدوئی، اِنجیلی یوحِنِّه فَصلی شَشی آیِه ای شُنزِه تا ویستَه یَکی.
رایگان برای استفاده، اقتباس و اشتراکگذاری تحت مجوز باز (CC BY-SA 4.0).