۳۴- عیسا مَثِلائی دیگِری یِه مِدِه
عیسِه آستُ نِکائی دیگِرییَن دِر مُوْرِدی پادیشائیئی خُدِه بات: مَثِلَن بِفِرمِش: «پادیشائیئی خُدِه عِینی خَردِلَه دُوْنایِه کو کَسی دَنین رَز دِمِکارِه. شِما خُوْ مِزُنین کو خَر دِلَه دُوْنا، کَستِرین دُوْنایِه.
«اَمّا وَختی اِن دُوْنا گُوْز مِبو، هَمِه زِراتی پی گُوْزتِری مِبو. اونقِد کو پِرِندِه ژین دِلَه شاخُن هِلاکی ماجِنَن.»
عیسِه اینییَه آستُنِکَه بات و بِفِرمِش: «پادیشائیئی خُدِه اُوزائی وارییَه کو جِنی دِلَه خَمیری موکوئَن تا اون دِلَه پَخش وابو.»
«پادیشائیئی خُدِه، گَنجی وارییَه کو ای نَفِری دِلَه رَزی قایَم کِربو. اینی نَفِری اون پِیدا کِربو وُ دوبارَه تَئی خاکین قایَم کِربیش. بَد خُشالی پی بِشابو وُ هَر چی دارِه بِروشِه کو پیل ژو دَستِه وُ اون رَز کو گَنج دِلَه دَرَه بِرینِه.»
«مَلِکوتی خُدِه، مُرواری وارییَه کو خِلی قَشِنگ و گِرُ نَه. ای تاجِری اونَه بِدییِش، هَر چی دِردِش بِروتِش تا با پیلی ژو، اونَه بِرینِه.»
اونجو کِسانی دَبِن کو گُمُن ماکِرشُن با کارائی خُوْری کو هاکِرچیشُن، خُدا ژُن قَبیل مِکِرِه. اونی دیگِرون کو کارائی خُوْری مِناکِرشُن، مَخسِرَه مکِرشُن. پَس عیسِه ژُنَه اِن آستُنِکَه تَریف هاکِرد؟ دو نَفِری بِشِن مَعبِد تا دا هاکِرَن. ای نَفِر مَذهِبی رَه بِری وُ اینی مالیاتی بِگیر با.
مَذهِبی رَهبِری بِشتا وُ اِن طُوْری دا هاکِردِش: «اِی خُدا تَه شُکر ماکِرُن کو مِثلی آدِمائی دیگِری، گُناکار، دُزد، ظالَم و زِناکار و حَتّا اِنی واری باجگیر نییون.»
هَفتِه ای دو دَفَه روزَه مِرون و هَر چی پیل و دَرآمِد مو دَس مِه، دَس بِه یَک تَه مِدون.
اَمّا اون باجگیر دیرتِری اون مَذهِبی رَهبِری بِشتا وُ وَختی دائی، حَتّا سَر طَرِفی آسِمُنی بُلِند ناکِردِش. بَلکِش مُشتی رَه هُشتُن سینَه کوآتِش و باتِش: «خُدایا مو رَه رَحم هاکَه کو گُناهکارون»
بَد عیسِه اِدامَه بِدا: «حَقیقِت شِما رَه مایون، خُدِه اون باجگیری دا بِشنوآ وُ ژو قَبیل کِردِش. خُدا هَر کین کو قُراب بو، خار و خَفیف ماکِرِه وُ هَر کین کو هُشتُن کَسین واکِرِه، سَربُلِند ماکِرِه.
آستُنِکَه وِتَه بِبا کِتابی مُقَدِسی پی اِنجیلی مِتِه فَصلی سیزدِه، آیِه هائی سییَه یَکی تا چِلَه شَشی، اِنجیلی مِرقِسی فَصلی چاری آیِه هائی ویستَه شَشی تا سییَه چاری، اِنجیلی لوقِه فَصلی سیزدِه آیِه هائی هِژدِه تا ویستَه یَکی، فَصلی هِژدِه آیِه هائی نَئی تا چاردِه.
رایگان برای استفاده، اقتباس و اشتراکگذاری تحت مجوز باز (CC BY-SA 4.0).