۱۰- دَه بَلا

خدا موسایون هارون را هُشدارِش آدا که فِرعون خیلی سَرسَخته. موسی و هارون بیشیندهِ فِرعونِ پَلِف، واچون: «اِم پَیامِ خدای اِسرائیله اِشتِه را: چِمه طایفه ولهِ یِه تا بیشونده.» فرعون جاناش گَپ گوشهِ نیهِ، عَوَضِ اینکه قومِ اسرائیله آزادِ یَره، بَتَر جاناخو ویشتَر کارِش بِکَشَست.

فرعون هَمی بیَن سَرپیچیش میهِ از اینکه قومِ اسرائیله آزاد یَره. جی واسِین خدا دَه جور بَلاش، مِصرهِ سَر خالیهِ یه. خدا جی طِریقه دِ فرعونِش حالی یَردِنَست که خدا قدرَتِش از فرعون و هَمی خدایان خو ویشتَرهِ.

خدا رودِ نیلِش تبدیل به خِم یهِ. آما همچنان فرعون، اسرائیلیونِش وِلهِ نیهِ.

خدا کُلِّ سرزمین مِصرِش پَر از قورباغه یهِ. بعد فرعون، موسی خو دَرخواستِش یهِ، واچه که: ایکار یه جی قوباغون مِصرِ دِ بیشون بَر. بعد از اینکه قورباغون، بِینِ دِ بیشینده، تازه فرعون بیرحم تَر آوه وَ بَتَر اِجازه‌ی خروجِش مِصرِ دِ جانارا آنِدا.

خدا دِ بَلای پَشه و بعداز پشه، بلای مَگَسونِش بُروستای مِصرِ را. فرعون دِ موسایون هارونِش وات: اگه جی بَلایون مِصرِ خو دِروَرِندِه، اجازه آندیهِ که آنا مِصرِ خو بیشونده بَر. بعد از دعای موسی خدا جی بلایونِش دِروِه یه، منتها هاموندِه فرعون دل سخت تَر آوه، دوبارِه جانارا اِجازیش آنِدا مصرِ ترکِه یَرِندِه.

خدا دوباره ایکارِش بیهِ تمام حیوُنات که مِصریون وینده، همه مَریض آوینده، همه بینِ دِ بیشونده. اما فرعون دل سختاوِه وی و اِم سیری دِ جانارا اِجازِه بیشییَنِش آنِدا.

خدا موساش وات مُشتونِش پُرِه یَره خاکِ وَ فرعونِ پَلِفِ دِ جانا آپاچه دیمه هاوا. وقتی موسی جی کارِش بیهِ، تمومِ مِصریون به غیر از اِسرائیلیون دچار مریضی سخت گَردِستینده. اما هامون دِ فرعونِ قلب خِیلی سخت تَر آوه و هامون دِ اِجازیش آنِدا که جانا مصرِ دِ خارِج آوینده.

دوباره خدا تِرِزگاش بَلا بور جینا سَر وَ ویشتَرِ محصولاتِشون و هَر جانداری که فضای آزادِ وِ، بِینِ دِ بِبَرچه. بعد فرعون، موسی و هارونِش وات که: «از اِم سیری گونام بیِردی، شما آزادیون که بِشیا». بعد موسی دُعاش بیه و تِرِزگِه بَندومیه.

آما هامون دِ فِرعون گوناش بیهِ وَ قَلبِش سَخت تَراش یه وَ اِجازیش آنِدا که اِسرائلیون آزاد آوینده و بیشونده.

دوبارِه خدا مَلَخونِش بِروستا سَرزَمینِ مِصر. آ مَلَخون دِ هر چی محصولات که تِرِزگِ خو دَر امون وینده و بِمِنده وینده، آ مَلَخون جاناشون بوخا.

آسان خدا ای بَلای تاِرکِش بِروستا که سو رِو طولِش بِکَشت. هَمه یاقا بیَن تارِک وِ که مِصریون اصلا مونوتونِستیندِه کیشونِ بَرآنده بَر. آما آقا دِ که اِسرائیلیون زندگیشون میه، روشیناوِه.

هامون دِ جی ای بیَن بَلا وی، هامون دِ فرعون اجازیش آنِدا که اِسرائیلیون بیشونده. از آقایی که فرعون گوشِ شِنَواش نِدَشت، خدا تَصمیمِش بِگِر آخَرین بَلا دِ نازِله یَرِه. اِم آخَرین بَلا باعِث مِگَرده که فرعون نَظَرش عوض آوِه.