۱۵ - سرزمین موعود

سر انجام موقیش گَردَست که قوم اسرائیل وارد سرزمین موعود یعنی کنعان گَردِنده. آگا دِ ایدینه شهر وِ به نام اریحا که گِردا گِردِش پِلّهِ که دیوار وِ. یوشع دو دونه جاسوسِش بِروستا جا شهر. آگا دِ ایدینه بدکارهِ زِینیه زِندِگیش میهِ به نوم راحاب. آوِ جا، جاسوسونِش خوشتَنَرِش وَرِ دِ نیاش مِدَشت وَ جاناش کمک میهِ که شَهرِ خو ویریجِنده. آوِ چون خداش ایمانِش دَشت، جی کارِش بیهِ. جاسوسون راحابهِ را قولِشون آدا وقتی اریحاشون نابودِیهِ، جاوِیون خونِوادیش خو محافظت یَرِنده.

برای اینکه اِسرائیلیون بِتونونده بِرَسِنده به سرزمین موعود، باید رودِ اردنهِ خو عبورِشون میهِ. خداوند یوشع را دَستورِش آدا: «کاهنون پیشاپیش بِروست.» وقتی کاهِنون پا بوخارچه رودخونه وویهِ، وویهِ بَند بومیه و اسرائیلیون بوتونِستیندِه زمینِ خشکِ سَرِ دِ بیشیندِه رودخونه‌ی آوَرِ طرف.

بعدِ جا که قوم، رودِ اردنِ خو رَد آوینده، خدا یوشع را واچه که: آماداوِه برای یورِش به شهرِ قدرتمند اریحا. خدا مردُمون را واچه کاهِنون وَ سربازون باید شیش رِو، ِرِوی ایرا شَهرِ دورِ دِ راهپِیمایی یَرِنده. پس کاهِنون و سَربازون جی کارِشون اَنجوم آدا.

هَفتِمین رِوِ دِ باید اسرائیلیون هفت را، شَهرِ دور ِ، دورِشون مِزَند، آسان کاهنون شِیپور بِزَنِنده و اعلام یَرِنده و همه‌ی مردم فریاد بِزَنِنده وَ واجِنده که آنا جی کارِشون انجام آدا.

آ سان دور تا دورِ دیوارِ اریحا همه بوخوریَس زِمین. اسرائیلیون هر چی شَهرِ مونِه دِ وِ هَمیشون نابودِ یهِ طِبق دَستور خداوند. تنها راحابیون وَ خانِوادیش که بِپِیوِستینده به اسرائیلیون، دَر امان بِمِندینده. وقتی دیگر اَقوامی که سرزمینِ کنعانهِ دِ ساکِن وینده، حالی آوینده که اسرائیلیون، اریحاشون ویرون یِردی، بِتِرسِستینده و واچون مبادا قوم اسرائیل به چوما دِ یورِش بورِه.

خدا قومِ اسرائیله را دَستورِش آدا که کَنعانهِ دِ هیچ قومی، پیمان آشتی نبَندِندِه. ولی ایدینه قَبیله‌ی کنعانی به نوم جبعونیون، یوشعِ را دوروشون وات وَ اِدِعاشون یهِ کهِ خیلی دِروتر از کنعونِه بومیندِه. آنا یوشعِ خو بُوقوچون که جانابی پِیمان دوستی بِبَنده. یوشع و اَلادهِ رَهبَرونِ اِسرائیل، بدون اینکه خدابی مَشوِرَت یَرِنده، پِیمان صلح با جبعونیون بی بِبَچون.

بعد از سو رِو اسرائیلیون حالی یاوینده که جَبعونیون در حقیقت همین اَهلِ کنعانینده. بعد از اینکه حالی یاوینده جیناشون فریب آدا، خیلی ناراحت آوینده. آما پِیمانِ صُلحِشون جانا بی نِشکِست، چون آ پِیمون در حظورِ خدا ببندِی یِستِه وی. ای مودَّت بعدِ جا، پادِشاهون اَلادِ قَبیلون، از کنعانِندِه به نام اموریون وقتی حالی یاونیده که جبعونیون بنی‌اسرائیله بی پِیمانِ صُلحِشون بِبِستی، هم دیَری بی هَم پِیمون آوینده که خوشتَنَرِشون سِپاه گِردِه گِرِندِه وَ به جبعونیون حمله یَرِنده. جبعونیون یوشعِ خو درخواستِ کومَکِشون یهِ.

یوشع تمومِ سپاه اِسرائیلِش گردِه گه. آنا کولَّن شو رامونه وینده تا بهِ جبعون بِرِسِستینده. صُبحِ زِو آنا، اموریونِشون غافلگیرِ یه و جاناشون حَمله یِه.

خدا آ رِو اِسرائیلیون را جَنگِش یه، خدا اموریونش سَردَرگَمهِ یه، پِلّهِ تِرِزگونِش بِروستا آسمونِ دِ وَ خیلی از آموریونونِش بِکوشت.

همچنین خدا ایکارِش بیه که خورشید آسِمونه مونهِ دِ حَرِکَتِش نیه، تا سربازان اِسرائیلی زَمانِ ویشتَرِشون دَشته وی برای شکست کاملِ اموریون. خدا آ رِو پِلّهِ تَرین پیروزیش برای اسرائیلیون‌ فراهَمِ یه‌.

بعدِ جا که خدا جا لَشکَریونِش شکست آدا، خیلی از قَبیله های کنعانی برای اینکه اسرائیلیونِ حمله یَرِنده، دوباره هم پیمان آوینده باهم. یوشع و اسرائیلیون تصمیمِشون بگهِ حمله بِبَرِنده جانا و جاناشون نابودِه یه.

پس از جی جَنگون خدا همه‌ی اسرائیلیون سهم، سرزمینِ موعودِ خو آدایشِه. سپس خدا آرامِشِش در سرزمین مرزهای اسراییل برقرارِ یه.

چون یوشع پیر آوه وی، همه‌ی قوم بنی‌اسرائیلِش گوریهِ زَند هَم دیَره پَلِف. بعد آ مردومونِش خیال شین که آنا قولِشون آدِه وی که آ عهدی که خدا کوهِ سینا سَرِه جاناوی بِبِستِه ویش اطاعت بیَرِندِه. مردم قولِشون آدا که نسبت به خدا وفادار بیمینِندِه و از شریعتِ خدا اطاعت یَرِنده.