۲۱- خداوند مسیح بومِیَین وعدِه آندِیِه

از هَمی جا اول آفِرینِش خدا خور موزونَسچِه که بعدِ ای مدت طولانی مسیح موعودِش موروستِه. آ به آدَمیون و هوا وَعدیش آدِه وی که جی کارِ بی شک اَنجوم آندییِه. خدا وعدیش آدِه وی که هوا نسلِ خو ای نفر ما که مارِ سَر آنکونه. ماری که هواش وازُو بِزَن همی آ شیطون وِه. وعدِه اِم وِه که مسیح شیطونِ کاملا شکست آندییِه.

خدا ابراهیم را وعدیش آده وی که به واسطه جا همه جَهونِ مِلَتون برکت آندارِندِه. آ به خوشتَنَرِش وعده بعدِ ای مدت مسیح بوروستییَن عَمَلِش میه. مسیح باید مَردومونِش از هر قومی دُنیادِه گُنایون خو نجاتِش آندا.

خدا موسی را وعدیش آدا که آیندِه دِ اینه نجات دَهندِه جا وِری پامبِه. اِم نجات دَهَندِه مسیحای موعود وِری وِه. بیَناوِه که خدا هامونه وعدِه مسیحِ بومییَن آدایشِه.

خدا داوود پادشاش وعده آدا که ای نفر جاوِه نسل خو به پادشاهی مِرَسِه و تا اَبد خدا قوم سلطنت مییَرِه. اِم جی معنی دِ وِه که مسیح داوودِ نسلِ خو ما.

از طِریقِ ارمیای نبی خدا وعدیش آدای که پیمونِ جدید جورِه مییَرِه، آما نه جا عهدِ وِری که خدا اسراییلی وی کوهِ سینا دِ بِبِستِه ویشِه. جدیدِه پیمونِ مونِه خدا خوشتَنَرِش قانونون مردُمون قلبِ دِه مینیسِه، مردن دِ شخصا جا مشناسِندِه و جاوِه محبت مییَرِندِه جاوِ احکام خو اطاعت مییَرِندِه. مسیح کسی وِه که جی پیمونِ جدیدِش جاناوی مِبَست. آنا جاوِه قوم و اِل طایفه مِگَردِندِه و خدا جانا گونایون مِبَخشِه.

خدا پیامبَرون همچنین واچون که مسیح موعود نبی، کاهن و پادشاه مِگَردِه. نبی کسی یِه که خدا گَپون مَشونِه و جاوِه مردمون را ماجِه. مسیح موعود خدا، نبی کاملی مِگَردِه چون آ خدا پیامون کاملا حالیامبِه و جاوِه کامل مردِمون را ماجِه.

کاهنون یهودی از طرف مردُم خدا را قوربونیشون میه که عَوَض جی وِه که گُنایونِشون مجازات گَردِه. همچنین کاهنون مردُمِ را خدا درگادِه دُویاشون مییِه. با جی حال قرار وِه مسیح موعود کاهن اعظمی گردِه که خوشتَنَرِش به عنوان اِینِه قوربونی کامل تقدیم خدا یَرِه. یعنی آ هیچ وقت گُنا مینییَرِه و وقتی آ خوشتَنَرِش به عنوان قوربونی تقدیمِه یَرِه، هیچ نیازی به قوربونی دییِه برای گناه نییِه.

پادشایون و رئیسون مردُمِ حُکمرونی مییَرِندِه بعضی موقِع دِ اشتبایونی دِرِندِه. داوود پادشا فقط اسراییلیونش حکومت یِه. آما مسیح موعود که داوود نسلِ خو ما به همه دنیا تا ابد حکومت مییَرِه. آ عادلونه حکومَتِش مییِه و دُرُستِه تصمیمونِش مِگِه.

پیومبَرونی که خدا طرفه بومِه ویندِه خیلی نبوتِشون دربارِه مسیح بیردِه وی نبی ملاکی نبوتِش یردِه وی که قبل از مسیح بومییَن اِینِه پیامبَرِ پِلِه ی دیِه ما. نبی اشعیای نبوتِش یردِه وی که مسیح موعود اینِه باکرییه خو دُنیا ما نبی میکاه دِ واتِه ویش که آ شهرِ بیت لحمِه دنیا ما.

نبی اشعیای واچه که مسیح جلیلِه دِ زندگی مییَرِه. آ بیشکییَستِه قلبون تسلا آندییِه و اسیرون آزادِه مییَرِه. آ همچنین نبوتِش یه که مسیح موعود مریضون یِعنی کورون، لَنگون، کَرون و گُنگون شفا آندییِه.

نبی اشعیای همچنین نبوتِش یردِه وی که مردم مسیح موعودِ خو بَدِشون ما و جاوِه قبول مینییَرِندِه. بقیه انبیا دِ نبوتِشون یردِه وی که ایدِنِه از مسیح رفقون جاوِه پُشت مییَرِه. ز کریا نبوتِش یِه که اِم رَفِق سی دونه سکه ی نُقری واسین جاوِ خیانت مییَرِه. اَلادِه انبیا دِ نبوتِشون یردِه وی که مسیح موکوشِندِه و جا اَرمازون سَرِه قرعه مِکَشِندِه .

همچنین انبیا درباره چییَن بومردَنِ جاوِه نبوتِشون یردِه وی. اشعیای نبی واتِه ویش که مردم جاوِه سر تُف ماشینِندِه و جا کُتک مِزَنندِه و مسخره مییَرِندِه. بعد جاوه یون لوکِه مییَرِندِه تا رنج و سختی وی بُمُرِه، با جی وجود که هیچ گُناش نییِردِوی.

اَلادِه انبیا دِ نبوتِشون یردِه وی که مسیح موعود باید اِنسون کامل و بدون هیچ گُنایی گردِه. آ باید بُمُرِه چون خدا جاوِش عوض گُنای همه مردم دنیا مجازات مییَرِه. جاوِه مجازات باعث مِگَردَس که بین آدَمیون خدا آرامِشیون صلح برقَراراوِه. به جی دلیل خدا اراده اِم وِه که مسیح ضربه وینِه و کُشتاوِه.

اَلادِه انبیا دِه جیشون نبوت یه که خدا مسیح بعد از بُمَردَنِش پایَردِنِه. پس بُمَردَن و پاوییَن مسیح مرگِ خو خدا موقوچه که نقشه ی گناکارون نجات کامِلِه یَرِه و آدمی وی تازِه پیمون بِبَندِه .

خدا خیلی چییاش درباره ی مسیحِ بومییَن انبیا را آشکاراش یِه. اما مسیح هیچگونی از جی انبیا زمونِه نومِه وی .۴۰۰سال ویشتَر بعد از آخرین نبوت، موقعی که زَمون به کمال بِرَسس، خدا مسیحِش به دنیا بُرُستای.