۲۵- شیطون عیسی وسوسه می یَرِه

بعد عیسی غسل تعمید، خدا روح بی لَنگی جاش بِبِه بیابون. یاقایی که به مدت چِل شونارِو رِوجیش بِگِه. آ موقع شیطون بومِه عیسی پَلِف جاش وسوسه یِه تا گُناه بی یَرِه.

شیطون عیساش وسوسه یِه و واچِه: « اگه تَه خدا فِریش، جی سَنگون واتَن که نون گردِندِه تا بوتونی بوخاری!»

عیسی جوابِش آدای: خدا کَلومِ مونِه بینیسییَستی «آدم زندِه بِمَندَنِ را فقط نونِش مِنوقو، بلکه به هر کلمه ای که خدا دونِه با بَر!»

پس شیطون جاش به بِلَندتِرین یاقای معبَد بِبِه و واچه: «اِگه تَه خدا فِریش خوشتِنِری انگادِه باشین زِمین؛ چون کتاب مقدس ماجِه: «خدا خوشتَنَرِش فِرِشتون ماجِه تا اِشتِه اُوقورِندِه، مبادا که پای بِزِنی سَنگِه.»

آما عیسی آ چیش که شیطون واتِه وی عَمَلِش نیه و جوابِش آدای: خدا کَلومِش مونِه خوشتَنِرِش قوم دَستورِش آدا که: «خدای خوشتِنِری خدا اِمتِحون مَیِه.»

بعدِش شیطون جاش بِبه بِلَندِه کو توک و همه ی کِشوَرای دُنیاش قدرت و ثروت جارا اُوَردِنَس و واچِه: «اِگه زُنِم بِزِنی و چِمه پَرَستِش یِری، همی جینا مِبَخشم اِشتِه.»

عیسی جوابِش آدای: چِمِه خو دِرواوا ای شیطون! خدا کَلوم مونِه آ خوشتَنَرِش قوم دستورِش آدای کِه: «فقط خداوند خدای خوشتنری پَرَستِش یِه و فقط جا خدمت یِه.»

عیسی شیطونِ وسوسون گرفتارانِوِه . پس شیطون جاش وِلِه یِه و فرشتون بومیندِه عیساشون خدمت بیه.