۳۰- عیسی مسیح پنج هزار نَفَره را غذا آندیهِ

عیسی برگُزیدونِش مژدِیون و آموزِشِ را به خیلی از دِهاتون بروستایش. بعد اَز آگَردَستَن، آنا عیسی شون از کارایی ک بییَردِویشون هالیاشون یَردِنَس. آسان عیسی جاناش به ای یاقایِ خَلوَت و نزدِکه دَریاچه بِبَرچه تا قِقِنه اِستراحت بیَرِنده. بنابراین همه بیشینده ای قایِقه مون و به طرفِ عَلاده روخونه بیشینده.

چون مَردوم وینچون که عیسی یون شاگِردونِش قایقِ آنیشتینده وَ کارا میشینده، دریا کِناره شُروریاشون یِه ویریتِن تا قبل از جانا به آوَرِ دریا برَسِنده. پس وقتی ک عیسی یون شاگِردونِش بِرِسِستینده آگا، ای عالَم مردم جینا چوشمِه را وینده وَ جانا خو استِقبالِشون یِه.

تعدادِ جانا به جُز زَنونیون زارون نَزدِکه پنج هِزار مَردَک وهِ. عیسی مسیح دل ای عالم جینا حاله را بیسوت، چون چَروا بِری اَوی صاب وینده. پَس شورِیاش یهِ جانا آموزش آدیَن و آنایی که مریض ویندِه شفاش آدا.

نیمه ی شو، شاگِردون بومینده عیسی پَلِف وَ واچون: «ای اُستاد، مَردومه بوروست تا خوشتِنَرِشون را غَذا بورِنده چون اِنگاده هیچی بُخواردَنه را آنِندارِنده.»

آما عیسی شاگِردونِش واچه: «شما خوشتِنیون جینا را غَذا آدِیا.» آنا جَوابشون آدا: «چیَن موتونوم جی تِعدادِ زیاده سیره یَروم؟! آما فقط پنج دونهِ نون وَ دو دونه گوجیلِ ماهی دِروم.»

عیسی خوشتِنَرِش شاگِردون واچه ک مَردومه واجِنده گروه های پنجاه نَفَری گَردِندِه وَ سوزَلا سَرهِ آنیشینِنده.

آسان عیسی پنج دونه نون و دو دونه ماهیش بِگه دَسِش وَ آسِمونِش بِشگَسس وَ خدا خو به خاطر جی بُخواردِنی یون شُکرِش یهِ وَ جاش برکت آدا.

بعد از جانا عیسی نونون وَ ماهیونِش تیکه تیکه یهِ وَ به شاگِردونِش آدایش تا مَردومهِ مونهِ پَخشه یَرِنده. شاگِردون مَردومه را غَذاشون آدا، همه بوخارچون و سیرآوینده، آما هیچی جا غَذایون خو کَما مِنِوه.

آسان شاگِردون غَذایون بِمَندِه گِرداشون گهِ و دوازده سَبَده از بقیه‌ی جا پنج دونه نون و دو دونه ماهی، پورا وهِ.