۳۷- عیسی ایلعازرِش زنده یِه

ای نفر وِ که نومِش ایلعازَر وِه، آویون دو خاکونِش مریَمه و مِرتا، عیسی نزدِکه رَفِقون خو ویندِه. ای رِو عیسی بَشونَچه که ایلعازَر حسابی مریضاوی. وقتی عیسی جی خبرِش بَشونَس واچه: «اِم مَریضی جاوِه مونوکوشِه بَلکَم پِلِّگی و جلال خدا همی را جا مونِه معلومامبِه.»

عیسی با وجود اینکه جاناش موقوس، دو رِو دِ آقادِ که وِه بِمَند. بعد اینکه آ دو رِو تاموناوِه عیسی شاگِردونِش واچه: «بایا آگَردوم یَهودیه.» آما شاگردونِش واچون: «ای استاد، همین چند رِو پیش وِه یهودیی مردُم موقوچون اِشتِه بوکوشِندِه!» عیسی جاناش جواب آدا: «چوما رَفِق ایلعازر آخوتی از باید جا پایَرِم.»

عیسی شاگِردون جوابِشون آدا: «خداوندا، اِگه آ آخوتی، خوارامبِه.» بعد عیسی واضِح واچِه: «ایلعازَر بُمِردی. خوشحالیم که آقادِه نِویم تا شما بوتونا چِمه اِیمون بُرا.»

وقتی عیسی به جا شهری که ایلعازَر زِندگیش میه بِرَسَس .چهار رِو وِه که ایلعازَر بُمردَنِ خو رَدّاوِه وی . مرتا بیشیهِ عیسی پَلِف واچه: «سرورم، اِگه ته اِنگادِه ویشه، بِرام مُنُمَرد .آما از ایمون دِرِم که هر چی که ته خدا خو بوقوی، اِشته را آندییِه.»

عیسی جوابِش آدا: «اَز قیومَتیون زندگیمِه. هر کَس چِمِه ایمون بورِه، حتی اِگه بُمُرِه، زندامبِه .هر کس چِمه ایمون بورِه دیه مُنُمُرِه. آیا چِمه جی گَپ ایمون دِیری؟» مرتا جوابِش آدای: «بله استاد از ایمون دِرِم که ته مسیح خدا فِریش.»

بعد مریَمه بیشیه عیسی پَلِف و بِکَته جاوِ پا و واچِه: «سرورم، اگه انگادِه ویشه بِرام مُنُمَرد.» عیسی جانا خو آپَرسَست: «کاده جایون جیرِه یِردی؟» آنا جوابِشون آدای: «اینِه قَبرِ مونِه. بیرو بِشگِه.» بعد عیسی بِربَنَس.

ایلعازَرِ قبر اِینِه غار وِه که پَرونِشه اِینِه پِلّه سنگِشون آنه وی. وقتی عیسی بِرَسَس قبر سَر جاناش وات: «سنگِ بِکَشا کِنار! اما مرتا واچه: «چهار رِوِ که آ بُمِردی. اَلون دیه جاوِه جنازِه بوش بِگِردی»

عیسی جوابِش آدا: « مِگِه نِواتیم اِگه همه ایمون بُورا پِلِّگی خدا میوینا؟» بعدِ جا سَنگِشون بِکَشَست کِنار.

بعد عیسی بِشگَسست آسِمونِه واچه : «پیوم، اِشته شُکر میَرِم که چِمه مَشونی. موزونِمه که همیشه چِمه گوشِه مییِری، ولی جیم جی مردِمون واسین که اِنگادِه یِندِه واتیم، تا اِیمون بورِنده که ته چیمی بُروستای.» بعد بِلَندِه صدا وی واچِه: «ایلعازَر، بی بَر!»

ایلعازَر، همی که یونِش کَفِنِ مونه وِه قبرمونه بَرومه. عیسی جاناش وات: «جاوه اُوشارا تا بوتونه را بیشو.» خیلی از جا یهودیون که جی معجِزیشون، وین عیساشون ایمون بو.

آما یهود پِلِّه شِخون خسِفتیشون بُوخا، بعد گِرداویندِه همدییَر دور تا عیسایون ایلعازَر را نقشه بِکَشِنده که جانا بُوکُوشِندِه.