۳۸- خیانت به عیسی

یهودیون هر سال، عید پِسَخِ شون جشن مِگِه. اِم جَشن، جاناش خیال ماشین که چییَن خدا صدها سال قبل، جاناش پییون از نوکِری مصر خو نِجات آداوی. نزدِکِ سو سال بعد از جاوِ که عیسی شوریاش یِردِه وی هَمی را نصیحتِش میه، شاگِردونِش واچه که موقوش عیدِ پِسَخِ جاناوی اورشلیمه دِ جشن بِگِرِم. آ جیشته واچه که آقادِه جاوِه موکوشِندِه.

یهودا اینه عیسی شاگردون خو وِه و خزانه دار گروهِ شاگردون وِه. ویشتَرِ وَقتون دِ جا خو فِلِش مودوزچِه. بعد جا که عیسی و شاگردونِش به اورشلیم بِرِسِستیندِه، یهودا بوشو یهود کاهن اعظمِ پَلِف و جانا را پیشنِهادِش آدا که عیسی لو آدِمه یاقاش چِمِه را فِل آدِه یا. آ هالی وِه که یهود پِلّون عیسی مسیحی وییَن قبول نِدِرِندِه و موقوشون جا بُکُشِندِه.

یهود پِلّه شِخون به رهبری کاهن اعظم، خیانت یهودا واسین و تحویل آدییَن عیسی به، سی دونه سکه نقریشون جاوِ را آدای. درست همی باین که پِلّون پیشگوییشون یِرده وی. یَهودا قبولِش یه و فِلِش اگِه و راکَت. از آقا به بَعد آ فِرصَتِ پِه یِه وِه که عیسی تسلیم جانا یَرِه.

عیسی اورشلیمِ دِ، عید پِسَخِش شاگِردونِش بی جَشنِش بِگِه. موقع شوم بوخاردَن پِسَخ، عیسی نونِش بِگِه پارِه یِه و واچه: «بِگِرا بوخارا، اِم چِمِه یونه که شما را آندم. جیوِه چِمِه خیالِه بوخارا.» بییَناوِه که عیسی واچه جانا خاطِرِه یون آندِم و یونِم جانارا قوربونی مییَرِم.

بعد عیسی پیلییِه شرابِش بِگِه و جاناش وات: «اِم چِمِه خِمنِه پیمونِ جدیدِ مونِه که شما گونا بِبَخشَستَنِ واسین میریجییِه. جی کارِه بعداً چِمِه واسین اَنجوم بِدِیا.»

بعد عیسی شاگِردونِش وات: «اینِه شمایون خو چِمِه خیانت مییَرا.» شاگِردون تعجبِشون یِه و واچون که بینِه کار مَییَرِه؟ عیسی واچِه: «آ کَس کِه جی دُرُمبِه چِمِه خو اَنگِرِه، خیانَت کارِه.» بعد نونِش آدا یهودا.

بعدِ جا یهودا نونِش اوقو، شیطون بوشو جا مون. آ بوشو یهود پَلِف تا جانا کُمک یَرِه عیسی بِگِرِندِه. اِما همه شو گَردَس .

بعد از غذا بوخاردَن، عیسی شاگِردونِش بی بوشو کوهِ زیتون طَرَف. عیسی واچِه: «اَشو همه چِمِه تَنا مَرزا. چون که بینیسییِستی: «چوپونِ مِزَنِمه و همه چَروایون وِلالامبیندِه.»

پترس واچِه: «حتی اِگِه همه اِشتِه وِلِه یَرِندِه، از جی کارِه مینییَرِم. » عیسی جاش وات: «شیطون موتونِه شما همی خوشتَنَرِش یَرِه، اما از اِشتِه را دویام بییِردی که ایمونی بینِه نیشو. باهَمه ی جیوا، اَشو، قبل اینکه خورِس بِخِنِه، ته سو را اِنکار مییِری که چمه مِشناسی.»

پترس عیساش وات: «حتی اِگه بُمُرِم، اِشته انکار مینییَرم.» آوِه کین شاگِردون دِ بییَن واچون.

بعد عیسی و شاگردونِش بیشیندِه جتسیمانی رَز. عیسی جاناش وات دویا یَرا که شیطون نوتونِه جاوِه وسوسه یَرِه. بعد جاش وِلِه یِه و بوشو خوشتَنَرِش خلوت مون تا دویا یَرِه.

عیسی سو را بییَن دویاش یِه: «ای پییوم، اِگه امکون دِرِه، اِجازِه آدی جی پیلییِه رَنجِ خو آنِخارِم. اما اگه الادِه راه برای بِبَخشَستَنِ گونای بَشَر نییِه، پس اِشتِه کار انجوم موخارِه.» عیسی بییَن هولاوِه وی که عَرَقِش قطره ی خِمنِ موشو. خدا اینِه فِرِشتیش بُروستای تا جا تقویت یَرِندِه.

بعد هر سیری دویا یَردَن، عیسی آنگَردَس شاگِردونِش پَلِف، آما جاناش خاوِه دِ میوین. سومین بار که آگَردَس واچِه: «پاوه یا، آ خیانتکارِه شاگِرد اِنگادِرِه.»

یهودا، یهود پِلّون بی، سربازون و پِلّه جمعییَتی وی بومه. آنا خوشتَنَرِشون بی شمشیریون چوشون دَشت. یهودا بومه عیسی طرف و واچه: «سلام ای استاد» و جاش ماچه یه. اِم ای نِشون وِه که عیساش اُوَردِنَچِه یهودیون که دستگیرِه یَرِندِه. عیسی جاش وات: «یهودا، آیا چِمِه ماچِه یَردَنی وی چِمِه خیانَت مییِری؟»

آموقع که سربازون، عیساشون بِگِه، پترس خوشتَنَرِش شمشیر بَرو و کاهن اعظم خدمتکارَر گوش بیربینچِه. عیسی جاش وات: «شمشیری غلاف یِه. از موتونِم پییَرِم خو بوقوم که اینِه لشگر فِرِشتون خو بُروستِه چمه کمک. امّا باید پییَرم خو اطاعت یَرِم.» بعد عیسی جا مردکِش گوش شفا آدا و همه شاگردون ویریتیندِه.