عیسی به صلیب بِکَشَستَن

بعد جا که سَربازون عیساشون مسخره یِه، جاشون بِبِه بَر تا به صِلیب بِکَشِندِه.آنا جاشون مجبورِه یِه که خوشتَنَرِش صِلیب بِکَشِه.

سربازون عیساشون ای یاقا بِبِه که جلجتا (یِعنی کَلّی اُسقونج) مِواچون و دست ِ پاش مِخِبی بیزیشون صِلیب سَر. آما عیسی واچه: «ای پیوم! جی مَردِمِ بِبَخش، چون ک حالی نییِندِه چی مییَرِنده.» به دستور پیتلاتس جاوِ جور سَرِه اِینِه سَنگ نِوِشتیشون آنا که جاوِه سَرِه بینیسییِستِه وی: اِم یَهودِ پادشاهِ.

بَعدِ جا، سَربازون عیسی اَرمازون سَرِه پوشکاشون باشین. جی کاری بی کتاب مقدسِ از قبل واتِه اَنجومِش بُخا که مِواچِه: «اَرمازونِم خوشتَن مونِه قِسماشون یِه و چِمِه سَرین اَرماز سَرِه پوشکاشون باشین.»

سَربازون همزَمون دونِه دُزدِشون دِ به صِلیب بِکَشدِنَس و عیساشون صِلیبِ سَرِه دِ آنایشون جانا موناقا. ا ینِه جانایون خو عیساش مسخَرِه مییِه، آما آوِکین جاش وات: «آیا تَه خدا خو مِنِتِرسی؟ آما گُنا کاریمون آما اِم مَردَک بی گُنایِ.» بعد عیساش وات: «ای عیسی! چِمِه خوشتِنِری پادشاهی مونِه خیالی بور.» عیسی جاش جواب آدا: «تَ هَمی اَرو چِمِبی بِهِشتِه دِرِیشِ.»

یَهودِ پِلّه شِخون و مردمی که آقادِه ویندِه عیساشون مسخَرِه یِه و واچون: «اِگه تَ خدا فِریشِه صِلیبِ خو بی جیر و خوشتِنِری نِجات آدی! بعد آما اِشتِه اِیمون موروم.»

اگر چه نُمَرِج وِ، اما پاک جا هولکی آسمون تارِکاوِه. اِم تارِکا تا سو ساعت اِدومیش دَشت.

بعد عیسی دادِش بِزَن: «تاموناوِه. ای پیوم، خوشتَنَرِم روح واگُذارِه مییَرِم اِشتِه دَسون.» بعد سَرِش خولِه یِه و خوشتَنَرِش روح تَسلیماش یِه. وقتی که یونِش آدا زِمین بِلَرزَس و معبد پِلّه پرده، که مَردُمِش خدا حُضورِ خو جویاش یِردِه وی جور تا جیر دوپاراوِه.

عیسی خوشتَنَرِش بُمَردَنی وی ای راش اُوشا تا مردُم بوتونِندِه باندِه خدا پَلِف. وقتی نِگَهبون رومی جیواش وین، واچه: «راستی که مردک بی گنا وِ . آ خدا فِر وِه.»

بعد دو نفر از یهود پِلّون، نیفودیموسیون یوسف که اِیمونِشون دَشت که عیسی هَمی آ مسیح موعودِ، پیتلاتس پَلِف بیشیندِه و بوقوچون که عیسی جِنازِه تحویل اَگِرِندِه. آنا جِنازیشون اُوپیشدِنَست کَتونی پارچی مون و آنایشون سَنگِ قَبرِ مون و اِینِه پِلّه سَنگِشون دِ قِلاشون دا قَبرِ پَرون تا بِبِندییِه.