۴۲- عیسی آگَردَستَن به آسِمون

آ رِوی که خدا عیساش مُردون مونِه پایِه، دو نَفَر جا شاگِردون خو موقِع بیشیَن به اِینِه جا نزدِکِ شَهرون، هر چی که عیسی را اِتِفاق بِکِته وی گَپِشون مِزَن. آنا اُمیدِشون دَشت که عیسی هَمی آ مسیح موعود گَردِه، آمّا جاشون بُکُشته وی. حالا زَنون ماجِندِه که دویَنبَرا آ زِنداوی، آمّا شاگِردون حالی نِیویندِه چی باوَرِه یَرِندِه.

عیسی شاگِردونِش نَزدِکاوِه و جانا بی گَپِش بِزَن اما آنا جاشون نِشناسَست. عیسی جانا خو آپَرسَست که چی بارِه دِ گَپ مِزَنِندِه. عیساشون وات گَپِشون جی اِتِفاق بارِه دِرِه که چند رِوِ پیش عیسی را بِکِته وی. آنا فِکرِشون میِه عیسی اِینِه غریبییِه که اورشِلیمِ اِتفاقون خو بی خَبَرِه.

بعد عیسی جانارا توضیحِش آدا، که خدا گَپ مسیحِ دربارِه دِ چیش واتِه وی. خیلی وقت پیش پیامبَرون واتِه ویشون که شَریرون مسیحِ شون شکنجه آدا و جا موکوشِندِه ولی آ سوِمین رِوِه دِ زِندامبِه.

وقتی آ دونِه مردک بِرِسِستیندِه، تقریبا شو گِردِستِه وی. آنا عیسی خو دَعوَتِشون یِردِه وی که شو جانا پَلِفه بیمینِه، آیدِه جاناوی بوشو اینِه کی مون. وقتی آنیشتیندِه شوم سِفری سَر، عیسی نونِش اوقو شُکرِش یِه و پاریش یِه. اِیبَدِه چوشمونِشون اُوشارییَست بی لَنگی جاشون بِشناسَست. ولی عیسی همی جا لَحظه جانا چُشم پَرونِه غیباوِه.

آ دونفر هَندییَرِشون وات: «آ عیسی وِ، جی واسینِ که آ کتاب مقدس بینیستون چوما را مِواچِه دِلِمون تُن تُن می‌زیش‌.» بعد جا بدون لَنگاوییَن آگِردِستینده اُورشِلیم و موقعی که بِرِسِستیندِه، شاگردونِشون وات: «عیسی زِندییِه! آما جامون ویندی.»

هَمی جا حالِه دِ که مشغول گَپ بِزَندَن ویندِه، ایبَدِه عیسی جانا مونِاقادِه ظاهِراوِه و واچِه: «یونیون سَلومَت گَردِه!» شاگِردون فِکرِشون یِه که روح میوینِندِه، آمّا عیسی واچه: «چرا بِتِرسِستیون! شک دِرا که از عیسی گَردِم؟ چِمِه دستِ پا بِشگَسا، ارواح چِمِه وارین جسم نِدِرِنده.» و جی واسین که جانا حالییِه یَردِنِه که روح نییِه، جاناش وات ایچی آدِه یا از بوخارِم. آنا ای تیکه ماهیشون آدا جاوِه و عیسی جاش بوخا.

عیسی واچه: «از شمام وات که هر چی کلوم خدا مونه دِ چِمِه بارِه دِ واتِه ویشون، باید اَنجوماوِه.» بعد جا عیسی جاناش کمک یِه تا خدا گَپون بهتر بَلَدِه گِرِندِه. آ واچه: «جا قدیمون، پیامبَرون کِتابون مونِه دِ بینیستِه ویشون که مسیح موعود باید سختیون زحمت بِکَشِه، بُمُرِه و سوِمین رِو موردون مونِه پاوِه.»

«پیامبَرون همچنین بینیسچییون که چِمِه شاگِردون خدا گَپون اِعلومِه مییَرِندِه و همی را ماجِندِه که باید توبه یَرِندِه. هر کَس کِه توبِه یَرِه، خدا جا گونایون مِبَخشِه. چِمِه شاگِردون اُورشلیمِه دِ شُرویاشون یِردی جی پیامِ واتییَن را، بعد همه ملت و قوم مون میشیندِه. شما همه شاهد چِمِه گَپون و تَموم اِتِفاقون یِیون که چِمِه را بِکِتی.»

عیسی جا چِهِل رِو بعد اینکه موردون مونِه دِ زِنداوِه وی، چَندین را خوشتَنَرِش شاگِردونِش اُوَردِنَچِه. آ حتی ای بار خوشتَنَرِش هم زَمون پونصد نَفَر دِ ویشتَر اُوَردِنَچِه. آ چَن رَوِشی وی خوشتَنَرِش ثابِتاش یِه به شاگِردونِش که زِندییِه و به جانا دربارِه ی پادِشاهیِ خدا بَلَداش مِدا.

عیسی شاگِردونِش وات : «خدا پاک زِمینیون آسِمون اِختیارات آدایشِه چِمِه. پس بِشِیا همه ی قومون چِمِه شاگِرد یَرا و جیوِه به نوم پییِه، فِر و روح‌القدس غسل تعمید یَرا و جیوِه بَلَدِه دِیا که چییَن پاک جا دَستورونِم که شما را آدا اِطاعت یَرِندِه. خیالییونِه گَردِه که از همیشه شماوی یِیمِه.»

چِهِل رِو بعد جا که عیسی موردون مونِه پاوِه شاگِردونِش بییَن وات: «اورشلیمه دِ بَشدایا تا چِمِه پییِه روح القدس بوروستِه، شما را قدرت آدییِه.» بعد جا عیسی جانا چُشمون پَرونِه آسِمونه طَرَف بوشو جور و اَبرِ مونِه دُیاراوِه. عیسی خدا راستِه دَس سَر آنیشت تا همه چی حکومت یَرِه.