۴۳- شروع کلیسا

بعد از اِم که عیسی به آسمون آگَردَس، شاگِردون باین که عیسی دَستورِش آدِه وی، اورشَلیمه دِ بِمِندینده. ایموُن داروُن مُورَتَب باهَم گِردامیوینده تا دوعا یَرِنده.

یَهودیون هَرسال رِوه مُهِمی به نوُمه پنتیکاسته جَشنِشون مِگه که مُصادِف با پنجاهِمین رِوِه بعد از عید پَسِخ وِه. پنتیکاست یَهودیون جشنِ برای برداشت محصول گندم وِه. آنا از سَرتاسَرِ دونیا به اورشَلیم مومینده تا جی جَشنه باهم برگزار یَرِنده. جا سال، جشن پنتیکاست، حدود ای هفته بعد از بیشییَنه عیسی به آسمون اتفاق بِکَت.

موقِعی که با اِیموندارون همدییَر دورِه گِرداوِه ویندِه، ایبَدِه ای صِدا عینِ شِدیدِه یاوا صِدا بَشونَچون. بَدِ جا ای چی آتِش وِری بومِه همه ی جانا سَر آتِشاش گِه. آ موقِع همه روح القدس خو پُراویندِه و خداشون به زُبونایی که مونوزونَچون پَرَستِشِشون یِه. روح القدس قدرت گَب بِزَندَن به زُبونونِش بِبِخشِستِه وی جانا.

وقتی مردومی که به اورشلیم بومه وینده، جی صِداشون بَشونَس، دور هم گردآوینده تا وینِنده چه اتفاقی بِکَتی. آنا بَشونَچون که ایموندارون کارای پله ی خدا اِعلومه مییَرِندِه. آنا اَز جی موضو شِگِفت زَداوینده، چون موتونَجچون جانا گَپوُن حالیاوینده. جانا کِشوَره، مردم اَلادِه زُبونِشون دَشت. شاگِردون اِسرائیله خو وینده وَ فقط موتونَچّون به زُبونای آرامی، عبرانی و یونانی گَپ بِزَنِنده. آما آنا بِشِنَچون که شاگِردون به جانا زُبون مادَری خدا کارون اِعلومه مییَرِنده.

بعضی دِه واچون شاگِردون مَستاوینده. آما پترس بَشتا وَ جاناش وات: «گوش یَرا! اِم مردم مَست نیینده! بلکه اِم هَمی آ یوئیل نبی پیشگویی یهِ کِه خدا واته ویشه: «رِوای آخر، از خوشنَرِم روح به همه بَشَریوُن مییَرِم.»

«ای قومِ اسرائیل، عیسی ای نَفَر وِ که عَجیب غَریبِ کارونِش انجام آدایشه تا خوشتَنَرِش چُما بِشناس دِنه. آ بوتونَس با قدرتِ خدا عَجیب غَریبه کارون بیَره وَ شما جیون موزونَس و شاهِدِ جی کارونِش وِیون اما هامون دِ جاویون به صِلیب بِکَشَست.»

«عیسی بِمَرد، وَلی خدا جاوِش دوباره مُردون مونِه پاش یِه وَ اِم گَپ پیشگوییهِ جا پَیامبَریه که واچه: تَه مِنِرزی که عزیزِه زارینِه ری یون قَبرِ مونِه فاسِداوِه. آما شاهِدیمون خدا عیساش مُردون مونِه پایِردی.»

خدایی که پییا، اَنه عیساش آسمونِ دِ در بالاترین جایگاه که آسمونهِ مونهِ دِ یهِ، خوشتَنَرِش راسته دَسه آنیشدِنِستی همی باین که عیسی وَعدیش آداوی، روح‌القدوسِش چُمارا بِروستا وَ اِم کارونی که اَنه میوینا و مَشونا همیش روح القدس مییَرِه.

«شُما عیسایون به صلیب بِکَشَست، آمّا هالی گَردا که خدا جاوِش، خدا و مسیح مَعلوماش یِردی.»

مَردُم شِدیدا تحت تاثیر پترسِ گَپون قَرارِشون بِگِر وَ بخاطِر جی هَم جاخو وَ هم اَلاده شاگِردون خو آپَرسَچون: «که اَنه باید چیَرُم؟»

پترس واچه: «همه‌ی شما باید گونایونیون بَخشیدا وِ. پَس توبه یَرا وَ در نومِ عیسی غُسل بِگِرا. آ موقعی که خدا روح القدس هِدیه دِ مِبَخشِه شما.»

تقریبا سوهزار نفر گَپونی که پترس بِزَنچه به جاوِشون ایمون بو وَ شاگِردِ عیسی گَردِستینده. آنا غسل تعمیدِشون بِگِه به جمعِ ایمون‌دارون اورشِلیمِ کلیسا دِ بِپِیوِستینده.

آنایی که ایمانِشون بورده‌وی، یِکسَره آچیایی که پِیامبَرون جانا را درسِشون آندای گوشاشون مییِه وَ همدییَر وی گِردامیویندِه، غَذاشون موخا، دُعاشون میهِ وَ آنا جمع مونِه خداشون مِپَرَستَس وَ هَرچی که دَچّون، باهَمدیه شِریکامیویندِه وَ مردم جانا دَرباره دِ خیلی خور گَپِشون مِزَند وَ هَر رِو، تعدادِ زیادی جاناش اِیمون مو.