۴۴- گَدا مَردَکه شفا پِترسیون یوحَنا طِریقه

ای رِو پِتروسیون یوحنا به طَرَف پَرَستِشه یاقا میشیندِه. دَروازی کِنارِه اینِه فَلَجِه مَردَکِشون وین که گَداییش مییِه.

پترس بِشگَسَس جا فَلَجه مردَکه و واچه: «اَ هیچ فِلی نِدِرِم که آدِم اِشتِه. آمّا آ چی که دِرِم آندِم اِشتِه. عیسی نومِه دِ پاوا و رابِشه!»

خدا هَمی آ لَحظه جا مردَکِش شفا آدا و آ شُرویاش یِه را بوشو و جانا طَرَفه خوشحالیش مییِه و خداش مِپَرَستَس. آدَمونی که پَرَستِشگاه حیاطِ مونِه ویندِه تَعَجُبِشون یِه.

تُندِنا خیلی جِمیعَت گِرداویندِه تا جا مَردِکی کِه شَفاش آنداستِه وی وینِندِه. پترس جا جَماعَتِش وات: «جی مَردک شفا خو تَعَجُب مَیَرا. آما جی مَردَکه قدرتِ واسین یا به دِلیل خوشتَنَرِمون دینداری شفامون آنِدا. بلکه اِم عیسی قدرتِه که جاش شفا آدا، چون آما به جاوِ ایمون دِروم.»

«شما آنایی یِیون که فَرموندارِ رومِ خو بوقوستیون که عیسی بوکوشِه. شما آ کَس که هَمی را یون آندییِه بوکوشتیون، آمّا خدا جاش موردون خو زِنده یِه. هر چند شما حالی نِوِه یون چی کارا مییَرا، آمّا انبیا از قبل واتِه عَمَلیاشون یِه که واته ویشون مسیح باید عذاب بِکَشِه و بُمُرِه. خدا بوقوچه که بییَناوِه. پس توبِه یَرا و به طرف خدا آگَردا تا آ شما گُنایون پاکِه یَرِه.»

موقعی که پَرَستِش گاه شِخون پترسیون یوحناشون گَپون بَشونَس خیلی عَصَبونیاویندِه. پس جاناشون بِگِه و باشیشون زِندون. آمّا خیلی از جانا که پتروسِشون پیغوم بَشونَس، ایمونِشون بو و تعداد ایماندارون به پنج هزار نفر بِرَسَس.

صاباینِه رِو، یهود پِلّون، پترسیون یوحناشون جا فَلَجِه مردکی وی هَمِرا بِبَرچون کاهِن اعظمیون شِخای مذهبی پَلِف. آنا پترسیون یوحنا خو آپَرسَچون: «چه قدرتی وی جی فَلَجه مَردَکیون شفا آدا؟»

پترس جوابِش آدا: «اِم مردَک که شما روبه رودِه بَشدای عیسی مسیحِ قدرتی وی شفاش آنداستی، شما عیسایون به صِلیب بِکَشَس، آمّا خدا جاش دوبارِه زِندِه یِه! شما جایون رَدِه یِه، آمّا اَلادِه راه نجاتی وجود نِدِرِه، جزعیسی قدرتی وی!»

شِخای مذهبی پِترسیون یوحنا شجاعت خو تعجُبِشون یِه، چرا که آنا بی سوادیون معمولی ویندِه. آسان خیالشون کَت که اِم مردَکون عیسی وی ویندِه. پس جاناشون وات: «اِگه هاموندِه عیسی بارِه دِ مردمی وی گَب بِزَنا شما به شدت تنبیه مییَروم.» آنا بعد از جی که پترسیون یوحناشون تهدیدِه یه جاناشون آزادِه یِه.