اِستیفانیون فیلیپس

ایدِنه از رهبرای کلیسای اول، ای آدم به نومِ استیفان وِ که همه جا را اِحتِروم قائل ویندِه. روح القدس جاوِ را قدرتیون و حکمتِش آدِه وی. اِستیفان خیلی معجزیش اَنجوم آدا و خیلیون جاوِه گَپون وی عیساشون ایمون بو.

رِوی که استیفان مشغول وِ عیسی دربارِه دِ آموزِش آدییِه، بعضی یَهودیون خو که عیساشون ایمون نِدَشت شُرویاشون یِه جَرِّ بَث استیفانی وی. آنا خیلی عَصَبونیاویندِه و به رهبرای مذهبی استیفان بارِه دِ به دورو واچون: «آما بَشونِستیمون که آ موسایون خدا بارِه دِ هَدَرِه گَپونِش مِزَن.» پس رَهبرای دینی اِستیفانِشون بِگِه و جاشون بِبِه کاهِن اعظَمیون بقیه رهبرای مذهبی پَلِف. بعدش دورو واجینه شاهِدونِ ویشتِری بومینده و جا بارِه دِ دوروشون وات.

کاهن اعظم استیفانِ خو آپَرسَچه: «آیا آ چی که اِم آدَمون اِشتِه بارِه دِ ماجِندِه راسته؟» اِستیفان جی سوال جواب خیلی گَبونِش کاهن اعظم را وات. آ واچِه که خدا ابراهیم زَمونِه تا عیسی دورِه خیلی پِلّه کارونِش یَهودیون را اَنجومِش آدا، آمّا اِم اِل طایفه خیلی موقون جا خو نافَرمونیشون یِردی. استیفان جاناش وات: «شما ای اِل طایفه ی سر سَختیون و خدا برابَره نافَرمونیون. شما همیشه روح القدسیون رَدِّ یِردی، هَمی باین که چوما پیون همیشه خداشون رَدِّه یِردی و جاشون اَنبیا بوکوشتی. آمّا شما ای کاری بدتر از جانا بییِردیون، شما مسیحیون بوکوشتی!»

موقعی که رهبرای مذهبی جی گَبونِشون بَشونَست خیلی عَصَبانیاویندِه، گوشونِشون بِگِرچون و دادِشون بِزَن. آنا اِستیفانِشون بِکَشَس شهر بَر و جاشون سنگسارِه یِه تا بُمُرِه.

استیفان جا حالی که یونِش آدا دادِش بِزَن: «ای عیسی! چِمِه روح قبول یِه.» آ موقع زانوش بِزَن و دوباره دادِش بِزَن: «خدایا! جی گونا جینا خو مَزون » و بعدش یونِش آدای.

آ رِو خیلی از اورشلیم آدَمون شُرویاشون یِه به اذیت و آزار عیسی طَرَفدارون و با ایمونون ویریتیندِه اَلاده یاقا. آمّا با وجود اِم اِتِفاقون، آنا هر یاقا که میشینده عیسی بارِه دِ گَبِشون مِزَن.

اینِه شاگِردون خو که نومِش فیلیپس وِ خیلی از با ایمونِه آدَمون بی هَمِرا، موقع ظلم دِ اورشلیمه ویریته وی. آ بِشه وی سامِره، اُوقادِه عیسی بارِه دِ گَبِش مِزَن و خیلی از اُوقا مردُم نِجاتِشون آنداس. بعدش ای رِو اینِه فرشته خدا طَرَفه فیلیپس را دَستورِش آدا بیشو اینِه جاده بیابون مونه. موقعی که آ جا جادی مونِه وِ اینِه از حبشی مُهمِه آدَمون خو وینچِه که خوشتَنَرِش اَرابی وی سَفَرِش میه. روح القدس فیلیپسِش وات تا بیشو جا مردک پَلِف و جاوی گَب بِزَنه.

موقعی که فیلیپس نَزدِکاوِه اَرابی بَشونَچه که آ آدم حبشی ای قسمت از کتاب اشعیای نبی کارا مِخِنه. اُوقایی که ماجِه: «عین جا چَروایی که قوربونی را مِبَرِندِه و وَرِه ای که خوشتَنَرِش پَشم چینون پَلِفه ساکته، هیچ ای کَلِمیش دِ نِوات. جاوی ناعادِلونه بَرخوردِشون بیه و اِحترومِشون نییِه. آنا جاشون یون اَگِه.»

فیلیپس جا حبشی آدمِ خو آپَرسَچه: «آیا جا چی که مِخِنی حالیامبی؟» حَبَشی آدم جوابِش آدای: «نه. اَز مونوتونِم جاوِه حالیاوِم مگر اینکه ای نفر چمه را توضیح آدیه. خواهش مییَرِم بیرو و چِمِه پَلِفه آنیشین. آیا اشعیا جی خوشتَنَرِش بارِه دِ یا اَلادِه کَس ماجه؟»

فیلیپس بوشو اَرابی مون و جاوِه پَلِفه آنیش، بعدش حبشی را توضیحِش آدا که اشعیا جا قسمَتِشون عیسی بارِه دِ بینیستی. فیلیپس خیلی از قِسمَتون از خدا کَلوم جاوِه را توضیحِش آدا و اِنجیل عیساش پیغوم جاوِه را بِرَسدِنَس.

جی حاله دِ که فیلیپسیون حبشی مردَک میشیندِه، بِرِسِستیندِه اینِه هویه ویه. حبشی مردَک واچه: « بِشگِه اِنگادِه وییه یا! آیا مِگَردِه غُسل بییَرِم؟» و خوشتَنَرِش نوکَرَر دَستورِش آدای که اَرابی نیادِرِه.

پس آنا بیشیندِه ویه مون و فیلیپس حبشی مَردَکِش غسل آدای وقتی که ویه خو بومیندِه بَر، ایبَدِه روح القدس فیلیپسِش بِبه اَلادِه یاقا. فیلیپس اوقاده دِ عیسی بارِه دِ موعظیش یِه.

حبشی مردَک سَفَرِش به طرف خوشتَنَرِش کیه اِدومیش آدا. آ از جیوه که عیساش بِشناسِستی خوشحال وِ.