۴۸- عیسی مسیح وعده آدییِستی

آ موقه خدا دنیاش سابِدا، همه چی تکمیل وِ و گونا نِوِ. آدِمیون حوا همدییَرِشون موقوست و خداشون دِ علاقه دَشت. هیچ مریضی یا بُمَردَن نِوِ. اِم هَمی آ دنیایی وِ که خدا موقوچه.

شیطون به وسیله ی ماری که رَزِ مونه وِ ، حوّابی گَبِش بِزَن. چون موقوچه جاوِه سَر وازو بِزَنه. بعد آوه یون آدم گوناشون بیه. به دلیل گَپ گوشه نییَردَن جانا، همه ی آدَمون محکوم به بُمَردَنِندِه.

حتی بخاطر گونا بییَردَن آدَم و حوا اتفاق وحشتناکتِری دِ بِکَت، آنا خدا دُشمَنون گِردِستیندِه. در نتیجه از جا زَمون تا اَلون، همه گوناشون بییِردی، هر کِه که جا موقع به دنیا ما خدا دُشمَنه. خدایون آدَمِ مونه دِ رابطه ی خوری نِوِه، آمّا خدا موقوچه صلح برقرار گَردِه .

خدا وَعدیش آدا که ای نَفَر حوّآ نسل خو شیطون سَر آنکونِه و شیطون جاوِه پاشینییِه مِگَزِه. به جی معنی که شیطون مَسیحِ موکوشه، آمّا خدا جاوِه دویَنبَرا زِنده مییَرِه. آ موقه مسیحِ وعده آدییِسته شیطون زور برای همیشه بینِه مِبَرِه. بَعد چند سال، خدا روشیناش یِه ک عیسی، هَمی آ مسیحه که وَعده آدییِستی.

خدا نوحِش وات تا اینِه کِشتی سابیدییِه که خانوادییَرِش جا طوفونی که موقو بُروسته خَلاصه یَرِه. بعد جا خدا جانایی که جاشون اِیمون دَشت نِجات آدا. به جی رَوش همه ی آدَمون گونایونِشون خاطِرِه حَقِشونه که از طرف خدا بُمُرِندِه. آمّا خدا عیساش بُروستا که هر که جاش ایمون بورچه نجات آدییِه.

صدها سال خاطِرِه، کاهِنون آدَمون واسین خدا پَلِفه قوربونی مییَرِندِه. اِم کار مردِمونِش اُنوَردِنَست که گوناشون بییِردِوی و حَقِشونه که خدا طَرَفه مُجازاتِشون دِشته بی. آمّا آ قوربونیون مونوتونَچون باعث بخشش جا آدَمون گونایون گَردِه. عیسی پِلّه پیرِه. آ ای کارِش بیه که پِلّون نوتونَسچون جا کارِه بییَرِندِه. آ خوشتَنَرِش فدا یه تا اِینه قوربونی آدمی زاده گونایون را آماده گَردِه. آ قبولِش یِه تا عَوَض همه ی آدمون گونایون، مجازات گَردِه. همی جی خاطِرِه عیسی پِلّه پیر گَردَس.

خدا ابراهیمِش واته وی: « اِشته طَرَفه همه ی دنیا اِلِ طایفی یَر برِکَت آندِم.» عیسی ابراهیم نَسلِ خو وِ. خدا ابراهیمِ طَرَفه همه ی مردم جهانه برکت آندییِه، چون که هر که عیسی ایمون بورِه گونا خو نجات آندارِه‌. وقتی اِم مردم به عیسی اِیمون مورِندِه، خدا جانا ابراهیمِ نسلِ خو موزونه.

خدا ابراهیمِش وات که فِرَرِش اسحاقِ جا را قوربونی یَرِه. آمّا خدا اِینه وَریش اسحاق یاقا جورِه یِه تا قوربونی گَردِه. آما همه ی گونایونِمون خاطِرِه سِزاوارِه مَرگیمون! آمّا خدا عیساش بِبَخشَچه به دنیا تا چوما یاقا قوربونی گَردِه و بومورِه. همی جی خاطِرِه دِ عیسی خدا وَرِه ماجوم.

وقتی خدا آخرین بَلاش مصرِ را بُروستای، هر خانواده ی. اسرائیلِش وات تا اینِه وَرِه بوکوشِندِه. اِم وَره باید عیبِش مِنِدَش. بعد آنا باید جاشون خِمن کیشون بَرِ چارچوب پَلِفیون سَر آمپاچون. وقتی که خدا جا خِمنِش میوین جانا کییون خو رَدامِوِه و جا خانِوادیش اولین فِرَر مونوکوشت. وقتی اِم اتفاق بِکَت .خدا جاش نوم آنا پِسَخ.

عیسی لاب عید پِسَخ وِریه. آ هیچ اشتباهی نییِردِه ویش و هیچ موقه گوناش نیه. آ هَمی جا عیدِ پِسَخ رِوُنِه دِه بُمَرد. وقتی ای نَفَر عیساش ایمون مو، عیسی خِمن، جا طرفه گونا جریمه آندا، مِندِری خدا، با مجازات نییَردَن جا، جا خو رَدامبه.

خدا بنی اسرائیلی وی پیمونِش بِبَست، چون آنا ای قوم ویندِه که انتخاباش یِرده وی تا جاوِ گَردِندِه. آمّا خدا اَلون اینِه تازه پیمونِش راشیندِه وی که هَمی دَم دَسه یِه. هر کَس هر قوم و قبیلی خو، اِگه جی پیمون قبول یَرِه، به خدا آدَمون اضافامبِه. آ به خاطر ایمون دَشتَن به عیسی به خدا آدَمون اِضافامبِه.

موسی پیامبری وِ که خدا گَبون بِلَنده صِدابی اِعلومِش یِه، ولی عیسی پلّه ترین پیامبرِه. آ خدایِ، پس هر چیش که آ اَنجوم آدا و واچه، خدا کارون و گَبون ویندِه. به جی دلیل که کتاب مقدس عیسی کلمه ی خدا مِخِنِندِه.

خدا پادشاه داودِش وات که ای نفر جا نسلِه خو تا آخر بر خدا آدَمون حکومت مییَره. عیسی خدا فِر و مسیح انتخاب شُدیه و آ جا داودِ نسلِ خو دِرِه که موتونه تا آخر پادشاهی بییَرِه.

داود قوم اسرائیل پادشاه وِ. آمّا عیسی همه ی جهان پادشاه. آ دوباره ما و عدالتیون صلحِ وی تا آخر پادشاهی مییَرِه.